पुणे – रविवारच्या रात्री पुणे शहरात खुनाच्या वेगवेगळ्या तीन घटना घडल्याने खळबळ उडाली असून पुन्हा एकदा पुणे पोलिसांच्या क्षमतेवर प्रश्नचिन्ह उभे राहिले आहे.
दत्तवाडी पोलीस ठाण्याच्या हद्दीत असलेल्या आंबिल ओढा वसाहतीत रात्री साडदहा वाजण्याच्या सुमारास नितीन कसबे (वय ३५) याच्यावर कोयता आणि सत्तूरने वार करण्यात आले. त्यानंतर गंभीर जखमी अवस्थेत कसबेला रुग्णालयात दाखल करण्यात आले असता तिथे त्याचा मृत्यू झाला. याप्रकरणी रात्रीच चैता रंडवे, श्रावण कुरुगे, काळ्या रंडवे आणि अन्य चौघांना अटक करण्यात आली.दुसरी घटना दत्तवाडी पोलीस ठाण्याच्या हद्दीतीलच राजाराम पुलाजवळ घडली. मोतीराम पवार या ५५ वर्षीय व्यक्तीचा डोक्यात दगड घालून खून करण्यात आला व नंतर त्यांचा मृतदेह कालव्यात फेकून देण्यात आला. ही हत्या पूर्व वैमनस्यातून करण्यात आल्याचे निष्पन्न झाले असून पोलिसांनी याप्रकरणी गणेश होले या इसमाला अटक केली.दरम्यान, कात्रजमध्येही अज्ञात व्यक्तीचा मृतदेह आढळला आहे. त्याचीही दगडाने ठेचून हत्या करण्यात आली असून पोलिस ओळख पटवण्याचा प्रयत्न करत आहेत.