कोल्हापूर – पूर्ववैमनस्यातून एका कुटुंबाला जिवंत जाळण्याचा प्रयत्न केल्याची धक्कादायक घटना कोल्हापुरात घडली आहे. रंकाळा परिसरातील  पानारी मळा या भागात राहाणा-या किशोर भोसले यांच्यासोबतच त्यांच्या कुटुंबियांना जिवंत जाळण्याच प्रयत्न करण्यात आला.
किशोर भोसले आणि रणजीत पांडूरंग मोरस्कर यांच्यात वारंवार हाणामा-या होत असत. या वैमनस्यातून हा प्रकार घडला. मोरस्कर यांच्या गुंडानी मध्यरात्री दोन वाजता भोसले यांच्यासह त्यांच्या गरोदर पत्नी आणि इतर तीन जण गाढ झोपेत असताना घरात रॉकेलचे बोळे फेकले आणि घराला आग लावून दिली.
तसेच भोसले यांच्या कुटुंबियांना घराबाहेर पडता येऊ नये यासाठी घराच्या कड्याही लावून घेतल्या. यावेळी घराच्या पाठीमागे दरवाजा असल्याने भोसले आणि त्यांच्य़ा कुटुंबियांना घरातून बाहेर प़डणे शक्य झाले यामुळे मोठी जिवितहानी टळली.
या घटनेमुळे रंकाळा परिसरात एकच खळबळ उडाली आहे. दरम्यान, या घटनेत कोणतीही जिवितहानी झालेली नसली तरी मात्र या आगीत त्यांच्या घरातील संपूर्ण सामान जळून खाक झाले आहे. या प्रकरणी लक्ष्मीपुरी पोलीस ठाण्यात गुन्हा दाखल करण्यात आला असून चौघांना अटक करण्यात आली आहे.