इस्लामाबाद – लष्करी शाळेवर झालेल्या दहशतवादी हल्ल्याच्या आठवणी ताज्या असतानाच पेशावर पुन्हा एकदा दहशतवादी हल्ल्याने हादरले आहे. पेशावरमधील शिया मशिदीवर शुक्रवारी काही अज्ञात दहशतवाद्यांनी हल्ला केला. या हल्ल्यात आतापर्यंत १९ जण ठार तर ५० हून अधिक जण जखमी झाले आहेत.
पेशावरमधील हयातबाद येथील शिया मशिदीमध्ये नमज पठण सुरु असताना हा हल्ला कऱण्यात आला. यावेळी तीन साखळी स्फोट घडवून आणले तसेच गोळीबारही कऱण्यात आला. यामध्ये १० भाविक ठार झाले तर ५० हून अधिक जण जखमी झाले आहेत. मृतांचा आकडा वाढण्याची शक्यता वर्तवण्यात येत आहे.
दरम्यान, मशिदीमध्ये अद्याप काही दहशतवादी असून सुरक्षा रक्षक आणि दहशतवाद्यांमध्ये चकमक सुरु असल्याचे वृत्त आहे.
याआधी गेल्या वर्षी १६ डिसेंबर रोजी पेशावरमधील लष्करी शाळेत दहशवातवाद्यांनी केलेल्या हल्ल्यात सुमारे १५० जण ठार झाले होते. यामध्ये १३६ विद्यार्थ्यांचा समावेश होता.
Copyright © 2026.