जळगाव – चाळीसगाव येथे बस स्टँडवर दागिने चोरल्याच्या आरोपावरून पोलिसांनी एका महिलेला अत्यंत अमानुषपणे मारहाण केली आहे. या घटनेचा व्हिडिओ व्हायरल झाल्यानंतर या पोलिसावर कारवाई करून त्याला निलंबित करण्यात आले आहे. या प्रकरणी अधिक चौकशीनंतर पुढील कारवाई केली जाणार असल्याचे पोलिस अधिकाऱ्यांनी सांगितले आहे.
ही घटना 21 फेब्रुवारीची आहे. पण सोशल मिडियावर हा व्हिडिओ व्हायरल झाल्यानंतर याबाबतचे गांभीर्य लोकांना समजत आहे. या व्हिडिओमध्ये दिसणारी महिला सुमारे 35 वर्षांची असल्याचे दिसत आहे. चाळीसगावच्या बस स्टँडवर ही महिला आरोपी दुसऱ्या एका महिलेचे सोन्याचे दागिने चोरण्याचा प्रयत्न करत होती. त्यावेळी लोकांनी तिला पकडून पोलिसांच्या ताब्यात दिले. या महिलेच्या विरोधात कोणीही लेखी तक्रार केली नाही. पण लोकांनी तोंडी माहिती दिली. त्यावरूनच शशिकांत महाजन नावाच्या पोलिस कर्मचाऱ्याने तिला अमानुषपणे मारहाण केली. महिला मदतीसाठी ओरडत राहिली पण कोणीही तिला मदत करायला समोर आले नाही. हा पोलिस कर्मचारी पीडित महिलेला केसांनी ओढून जवळपास 200 मीटर लांब अंतरावर असलेल्या पोलिस स्टेशनमध्ये घेऊन गेला. खुलेआम झालेल्या या अमानुष मारहाणीचा व्हिडिओ एका प्रवाशाने चित्रित केला आणि तो सोशल मिडियावर अपलोड केला.