प्रशासकीय अधिका-यांची एकाच ठिकाणी दोन वर्षे नियुक्ती
नवी दिल्ली : प्रशासकीय अधिकाऱ्यांच्या कामातील राजकीय हस्तक्षेप टाळण्यासाठी आएएस, आयपीएस आणि आयएफओएस या तिन्ही सेवांमधील अधिकाऱ्यांना यापुढे एकाच ठिकाणी दोन वर्षे काम करणे बंधनकारक केले आहे. तसेच दोन वर्षांपूर्वी बदली आणि नियुक्ती राज्य सरकारने नियुक्त केलेल्या नागरी सेवा मंडळामार्फत केल्या जातील, असे केंद्र सरकारने जारी केलेल्या नव्या नियमावलीत स्पष्ट केले आहे.
पर्सनल आणि ट्रेनिंग मंत्रालयाने याबाबत सर्व विभागांना परिपत्रक पाठविले आहे. बदली अथवा बढती किंवा निवृत्ती किंवा राज्याबाहेर नियुक्ती अथवा दोन महिन्यांपेक्षा अधिक काळासाठी प्रशिक्षणासाठी न पाठविल्यास कोणत्याही प्रशासकीय अधिकाऱ्यास त्याला नियुक्त केलेल्या पदावर दोन वर्षे काम करता येणार आहे. दोन वर्षांच्या आत अधिकाऱ्याची बदली करायची झाल्यास केंद्र किंवा राज्य सरकारला नागरी सेवा मंडळाची शिफारस आवश्यक आहे. यासाठी मुख्य सचिवांच्या नेतृत्वाखाली असे मंडळ स्थापन करावे लागणार आहे.मात्र, कारण दाखवून मंडळाची शिफारस नाकारण्याचा अधिकारही दिला आहे. पोलिस सेवांसाठी या मंडळात गृह खात्याचे सचिव आणि पोलिस महासंचालकांचा समावेश असेल.