मुंबई- पश्चिम दृतगती महामार्गावर मिलन सब वेजवळ बँकेच्या कॅश व्हॅनमधून सुमारे दोन कोटी रुपये चोरणा-या चार संशयिताना विले पार्ले पोलिसांनी ताब्यात घेतले आहे. या आरोपींकडे काही रक्कम सापडली असून त्याची मोजदाद सुरु असल्याचे पोलिसांनी सांगितले. पश्चिम दृतगती महामार्गावर शुक्रवारी सायंकाळी ही घटना घडली होती.
पोलिसांनी दिलेल्या माहितीनुसार, लोअर परळ येथील सुरक्षा कंपनीची बँकेची कॅश व्हॅन पश्चिम उपनगरातील एटाएम सेंटरमध्ये रोकड जमा करण्यासाठी निघाली तेव्हा गाडीत दोन कोटीहून अधिक रक्कम होती. या व्हॅनमध्ये सद्रे अलम याच्यासह अन्य तीन सुरक्षा रक्षक होते.
त्यानंतर अलम याने वरळीत गाडी थांबवून त्यातील अन्य तीन सुरक्षारक्षक आणि गाडी चालकाला चहा पिण्यासाठी उतरले होते. त्यावेळी अलमने त्यांना चहामधून गुंगीच औषध दिले. त्यानंतर गाडी मिलन सबवेजवळ येईपर्यंत त्या सर्वांना गुंगी येत होती.
चालकालाही गाडी चालवताना अवघड झाले होते. त्यातच पाठीमागून आलेल्या तीन जणांनी त्यांच्या व्हॅनसमोर गाडी उभी केल्याने व्हॅन थांबवावी लागली. त्या गाडीतील तीन चोरट्यांनी अलमच्या मदतीने व्हॅनचे लॉकर उघडून दोन कोटी चोरुन पळ काढला. याप्रकरणी पोलिसांना अलमचा संशय आला. त्याची कसून चौकशी करुन त्याच्या अन्य तीन साथीदारांना पोलिसांनी ताब्यात घेतले आहे.