धुळे – धुळ्यात धाडसी चोऱ्यांचे सत्रच सुरू असून, गुरुवारी मध्यरात्री सात दुकाने फोडल्यानंतर चोरट्यांनी शुक्रवारी मध्यरात्री बँक ऑफ बडोदा शाखेवर दरोडा टाकल्याची घटना घडली आहे. बँकेतून तब्बल ९६ लाख सहा हजार १०८ रुपये चोरट्यांनी लंपास केले आहेत. एका आलिशान कारमधून तीन चोरट्यांनी हा दरोडा टाकल्याचे सीसीटीव्ही कॅमेऱ्यात कैद झाले आहे. मात्र, त्यांचे चेहरे कपड्याने झाकलेले असल्याने त्यांची ओळख पटविणे अवघड झाले आहे.
शहरातील बाजारपेठ भागातील गल्ली क्रमांक पाचमध्ये बँक ऑफ बडोदाच्या मुख्य शाखेत शुक्रवारी मध्यरात्री दीड वाजता ही चोरी झाली आहे. बँकेत एका कारमधून तीन जण आले. तिघांच्याही तोंडावर कपडा बांधलेला होता. त्यांनी बनावट चाव्यांनी बँकेचा मुख्य दरवाजा उघडून आतमध्ये प्रवेश केला. त्यानंतर बँकेतील स्ट्राँग रूमलाही बनावट चावीने उघडले. तिजोरीतून ९६ लाख सहा हजार १०८ रुपयांची रक्कम एका बॅगमध्ये भरली. मात्र, चोरट्यांनी तिजोरीत असलेले सोने तारण योजनेतील जमा करण्यात आलेले सोने आणि इतर लॉकरमधील मुद्देमालाला हात लावला नाही. त्यानंतर बॅगमध्ये भरलेली रक्कम घेऊन आल्या दिशेने पसार झाले. चोरटे बँकेत सुमारे १५ ते २० मिनिटे होते. हा सर्व प्रकार बँकेच्या शेजारी असलेल्या दुकानांबाहेरील सीसीटीव्ही कॅमेऱ्यामध्ये कैद झाला आहे.
नेहमीप्रमाणे सकाळी साडेनऊ वाजेच्या सुमारास बँकेचा शिपाई साफसफाई करण्यासाठी बँकेत आला असता चोरी झाल्याचे निदर्शनास आले. त्याने तत्काळ बँकेच्या अधिकाऱ्यांना माहिती दिली. काही वेळातच बँकेचे मॅनेजर, शहर पोलिस ठाण्याचे निरीक्षक श्रावण सोनवणे, आझादनगर पोलिस ठाण्याचे निरीक्षक देविदास शेळके, गुन्हे शाखेचे पथक, श्वान पथक घटनास्थळी दाखल झाले. पोलीसांनी घटनास्थळाचा पंचनामा केला असून, शुक्रवारी मध्यरात्री दीड वाजता ही घटना घडल्याचे सीसीटीव्हीमधून स्पष्ट होत आहे.