गुवाहाटी – आसाममध्ये मतदान यंत्रातील तांत्रिक चुकीमुळे सर्वांच्याच भुवया उंचावल्या आहेत. गुवाहाटीत निवडणुकीपूर्वी मतदानाची चाचणी घेण्यात आली. यावेळी मतदान यंत्राचं कोणतंही बटन दाबल्यावर ते मत भाजपलाच जात असल्याचं निदर्शनास आलं. त्यामुळे मतदान यंत्रांच्या बिनचुकतेबाबत साशंकता निर्माण करण्यात येत आहे.
आसाममधील जोरहाट लोकसभा मतदारसंघात पाठवलेल्या मतदान यंत्रांमध्ये हा घोळ झाला आहे. ही मतदान यंत्र ( EVMs) हैदराबादमधील इलेक्ट्रॉनिक्स कॉर्पोरेशन ऑफ इंडिया या कंपनीने बनवली आहेत. ‘ जोरहाटमधील मतदान यंत्रांशी छेडछाड झाली आहे. ही मतदान यंत्र राजकीय पक्षांच्या प्रतिनिधींसमोर उघडल्यानंतर त्यांची चाचणी घेण्यात आली. त्यात ही यंत्र सदोष आढळून आली. आता ही मतदान यंत्र मतदान केंद्रावर पाठवण्यात येणार नाही,’ असं मुख्य निवडणूक अधिकारी विजेंद्र यांनी स्पष्ट केलं. सदोष मतदान यंत्राबाबत काँग्रेसने निवडणूक आयोगाकडे तक्रार केली आहे. तसंच आसाममधील सर्व मतदान यंत्रांची फेरतपासणी करण्याची मागणीही केली आहे.जोरहाट मतदारसंघात काँग्रेसचे उमेदवार माजी केंद्रीय बिजॉय कृष्ण हांडीक आणि भाजपचे युवा नेते कामाख्या तासा यांच्यात मुख्य लढत आहे. हांडीक हे सातव्यांदा इथून निवडणूक लढवत आहेत. या मतदारसंघात ७ एप्रिलला मतदान होणार आहे.