दिमापूर – दिमापूरमध्ये बलात्का-याला तुरुंगातून बाहेर काढून भर चौकात फाशी दिल्याच्या घटनेप्रकरणी १२ जणांना अटक करण्यात आली आहे. याआधी सहा जणांना याप्रकरणी अटक करण्यात आली होती. तसेच आणखी काही जणांना अटक होण्याची शक्यता आहे.
या शहरात लागू करण्यात आलेली संचारबंदी तीन वाजेपर्यंत शिथिल करण्यात आली आहे. मात्र मोबाईल, इंटरनेट आणि एसएमएस सेवा पुढील ४८ तासांपर्यंत बंद ठेवण्यात आल्या आहेत. दिमापूरमधील जनजीवन हळूहळू पूर्वपदावर येत आहे.
नागालँडमधील दिमापूर शहरात शुक्रवारी एका बलात्का-याला भर चौकात फाशी देण्यात आल्याची घटना घडली. नागा समुदायाच्या मुलीवर बलात्काराचा आरोप असलेल्या सय्यद फरीद खानला दिमापूरमधील नागरिकांनी खेचतच तुरुंगाबाहेर आणले. त्यानंतर त्याची शहरभर धिंड काढण्यात आली. तसेच त्याला मारहाणही केली. यातच त्याचा मृत्यू झाला. त्यानंतर नागरिकांनी त्याला भर चौकात फाशी दिली. आरोपी सय्यद खानचे अंत्यविधी त्याच्या आसाममधील जन्मगावी करिमगंज येथे आज पार पडणार आहेत. आरोपीच्या कुटुंबियांनी या प्रकरणी न्यायाची मागणी केली आहे.