ढाका – बांगलादेशची राजधानी ढाका येथील ब्रम्हपुत्रा नदीच्या किना-यावर पवित्र स्नानादरम्यान झालेल्या चेंगराचेंगरीत दहा हिंदू यात्रेकरु ठार झाले. यामध्ये सात महिलांचा समावेश आहे तर अनेक जण जखमी झाले.
सकाळी नऊच्या सुमारास ही घटना घडली. नदीच्या तटावर अस्तमी स्नानासाठी मोठी गर्दी जमली होती. यावेळी झालेल्या चेंगराचेंगरीत दहा यात्रेकरुंचा मृत्यू झाला. हे सर्व यात्रेकरु ५० हून अधिक वयाचे होते. मृतांमध्ये सात महिला होत्या अशी माहिती गुरुवारी पोलिसांनी दिली.तर या दुर्घटनेत ३० भाविक जखमी झाले. या जखमी भाविकांवर उपचार करण्यासाठी त्यांना जवळच्या रुग्णालयात दाखल करण्यात आले आहे. दरम्यान, या ठिकाणी भाविकांच्या सुरक्षेसाठी तैनात करण्यात आलेल्या स्वयंसेवक तसेच पोलिसांची संख्या कमी असल्याने चेंगराचेंगरी झाल्याचा आरोप काही यात्रेकरुंनी केला. ढाकामधील ब्रम्हपुत्रानदीच्या काठावर असलेले लागलबंध हे तीर्थक्षेत्र आहे. दरवर्षी मार्च महिन्याच्या अखेरच्या आठवड्यात नेपाळ, भारत, तसेच बांगलादेशातील मोठ्या प्रमाणात भाविक येथे पवित्र स्नानासाठी येतात.