औरंगाबाद – डॉ. बाबासाहेब आंबेडकर मराठवाडा विद्यापीठाचा बी. कॉम. परीक्षेचा पेपर फुटल्याने काल खळबळ माजली. तिसऱ्या वर्षाचा इनडायरेक्ट टॅक्स विषयाचा हा पेपर बाजारात उपलब्ध तर होताच त्याशिवाय व्हॉट्स-अपवरही हा पेपर ‘फिरत’ होता.
महाराष्ट्र नवनिर्माण विद्यार्थी सेनेने ही बाब विद्यापीठ प्रशासनाच्या निदर्शनास आणून दिल्यावर पेपर रद्द करण्यात आला. त्यानंतर काल उशिरा वेगळा पेपर देऊन विद्यार्थ्यांची परीक्षा घेण्यात आली.पेपर फुटल्याच्या निषेधार्थ मनविसेने विद्यापीठ मुख्य इमारती समोर प्रतिकात्मक काळा पेपर दाखवून आंदोलन केले.दरम्यान विद्यापीठाचे उपकुलगुरू डी.एम. नेटके यांनी पेपर फुटीचा मात्र इन्कार केला. त्यांच्या मते पेपर फुटला नाही, मात्र बाहेर फिरत असलेल्या प्रश्नपत्रिकेतील काही प्रश्न आणि प्रत्यक्ष पेपरमध्ये साम्य होते. या पेपरमधील पाच पैकी २-४ प्रश्न सारखे होते. याशिवय तो अंदाजपूर्वक काढण्यात आलेला कागद होता. तो कोणी काढून व्हॉट्सअपवर टाकला याचा शोध घेऊन पोलीस कारवाई येत्या दोन तीन दिवसात करणार आहे.