नाशिक – महाराष्ट्र आरोग्य विज्ञान विद्यापीठाशी संलग्नता असल्याचे भासवत योग नॅचरोपॅथीचे दुकान मांडणाऱ्या बोगस विद्यापीठाचा पोलिसांनी पर्दाफाश केला आहे. दशकभरापासून नाशिकरोडला बेमालूमपणे सुरू असणाऱ्या या विद्यापीठाच्या कारभाऱ्यांनी हजारो स्वप्नाळू तरुणांची फसवणूक केल्याची शक्यता पोलिसांकडून व्यक्त होऊ लागली आहे.
गेल्या आठ ते दहा वर्षांपासून इंडियन युनिव्हर्सिटी ऑफ अल्टरनेटिव्ह मेडिसिन्स अन्ड रिसर्च सेंटर या विद्यापीठाच्या नावाने योगा आणि नॅचरोपॅथीचे अभ्यासक्रम चालविले जात आहेत. नाशिकरोड येथील त्र्यंबक कॉम्प्लेक्समध्ये या विद्यापीठाचे कार्यालय होते. येथील अभ्याक्रमांना शासनाची तसेच, आरोग्य विज्ञान विद्यापीठाची संलग्नता असल्याचे सांगून, विद्यार्थ्याचा विश्वास संपादन केला जात होता. त्यामुळे विद्यार्थीही तेथे विविध अभ्यासक्रमांना प्रवेश घेत होते. विद्यापीठ तसेच, भारतीय पारंपरिक चिकित्सा योग नॅचरोपॅथी कॉलेजकडून फसवणूक होत असल्याचे लक्षात आल्यानंतरही गुपचिळी बाळगणाऱ्या विद्यार्थ्यांमुळे या विद्यापीठाचे कारनामे आजवर उघडकीस आले नव्हते. मात्र, ही फसवणूक काही जणांच्या लक्षात आल्यानंतर त्यांनी आरोग्य विद्यापीठाशी पत्रव्यहार करून संबंधित महाविद्यालयाच्या कारभाराबाबत संशय व्यक्त केला होता. या संस्थेशी आमचा कोणताही संबंध नसल्याची भूमिका आरोग्य विद्यापीठाने संबंधित पत्रव्यवहारकर्ते यांच्याकडे स्पष्ट केली. या संदर्भात पोलिसांना माहिती देण्यात आली. या संस्थेविषयी विद्यापीठाने घेतलेल्या अलिप्तपणाच्या भूमिकेनंतर पोलिसांनी संबंधित बोगस विद्यापीठ आणि महाविद्यालयाची माहिती घेतली. मान्यता नसतानाही योग अभ्यासाचे शिक्षण देणारे महाविद्यालय आठ ते दहा वर्षांपासून चालविले जात असल्याचा प्रकार उघडकीस आल्यानंतर फसवणुकीचा गुन्हा दाखल करण्यात आला आहे.