भंडारा – मुख्यमंत्री देवंद्र फडणवीस यांच्या विदर्भात भंडारा जिल्ह्यात महिला सुरक्षेचे भरदिवसा वाभाडे काढणारी धक्कादायक घटना घडली आहे. छेडछाड करणाऱ्याने दिवसाढवळ्या महाविद्यालयीन तरुणीचा तीक्ष्ण हत्याराने भोसकून खून केला. देवा गभने असं आरोपीचं नाव आहे. विशेष म्हणजे तरुणीने आरोपीविरोधात छेडछाडीची तक्रार करुनही पोलिसांनी त्याच्यावर काहीच कारवाई केली नाही.
महाविद्यालयात जात असताना आरोपी देवा गभने सतत पीडित तरुणीची छेड काढून तिचा छळ करत होता. त्याच्या छेडछाडीला आणि छळाला वैतागून पीडित तरुणीने आणि तिच्या वडिलांनी पोलिसात तक्रारही दाखल केली होती. पण पोलिसांनी आरोपीविरोधात काहीच कारवाई केली नाही. ही पीडित तरुणी आज महाविद्यालयात जात असताना आरोपीने तिच्यावर रस्त्यातच हल्ला केला. मरेपर्यंत त्याने तिच्यावर धारधार हत्याराने वार केले. यात पीडित मुलीचा जागेवरच मृत्यू झाला. या घटनेनंतर आरोपी देवा गभने याने स्वतःला पोलिसांच्या हवाली केलं. पोलिसांनी अटक करून त्याच्यावर खूनचा गुन्हा दाखल केला आहे.
खूनाच्या घटनेनंतर संतप्त गावकऱ्यांनी पोलिस ठाण्यात बाहेर आंदोलन करत पोलिसांच्या नाकर्तेपणाविरोधात घोषणाबाजी केली. तक्रार करुनही काहीच कारवाई न केल्याने ग्रामस्थ पोलिसांवर संतापले होते. घटनास्थळी मोठ्या संख्यने अजूबाजूच्या गावातीलही गावकरी गोळा झाले. आणि पोलिसांना पीडित तरुणीचा मृतदेह शवविच्छेदनासाठी घेऊन जाण्यास नकार दिला, अशी माहिती रामचंद्र भुरे या स्थानिक ग्रामस्थाने दिली.