मलकापूर, दि. ३ – बुलढाणा येथील मलकापूर येथे भरधाव वेगात असलेल्या फॉर्ड आयकॉन गाडीचे नियंत्रण सुटल्याने गाडी रस्त्यालगच्या सलुनमध्ये घुसली. या विचित्र अपघातात तिघा जणांचा मृत्यू झाला असून मृतांमध्ये दोघा सख्ख्या भावंडांचा समावेश आहे. या अपघातात आणखी दोघे जण जखमी झाले असून त्यांची प्रकृती गंभीर आहे.
जामनेर येथे राहणारे दत्तात्रय घोंगडे, त्यांचा भाऊ श्रीकृष्ण घोंगडे व अन्य तिघे जण खासगी कामानिमित्त शुक्रवारी सकाळी जामनेरहून अकोला येथे निघाले होते. दत्तात्रय घोंगडे हे स्वतः गाडी चालवत होते. राष्ट्रीय महामार्गावर मलकापूरजवळ दत्तात्रय घोंगडे यांचे गाडीवरील नियंत्रण सुटले व गाडी रस्त्यालगतच्या सलुनच्या दुकानात घुसली. दुकान बंद असल्याने तेथील कोणीही जखमी झाला नाही. पण गाडीचे चालवणारे दत्तात्रय घोंगडे, श्रीकृष्ण घोंगडे व भागवत गीते या तिघांचा घटनास्थळीच मृत्यू झाला. तर आणखी दोघे जण गंभीर जखमी झाले.
दरम्यान, शुक्रवारी पहाटे तीनच्या सुमारास यवतमाळमधील जामवाडी तलाव येथे लक्झरी बस झाडावर आदळल्याने बसमधील दोघा जणांचा मृत्यू झाला. तर पाच ते सहा प्रवासी जखमी झाले आहेत. मृत्यू झालेले दोघे जण डिग्रसमधील रहिवाशी असून अद्याप त्यांची नावे समजू शकलेली नाही.