नवी दिल्ली – केंद्रीय राज्यमंत्री आणि जालन्याचे खासदार रावसाहेब दानवे यांच्या गळ्यात अखेर महाराष्ट्र प्रदेश भाजपाध्यक्षपदाची माळ पडली आहे. पक्षाचे राष्ट्रीय अध्यक्ष अमित शहा यांनी दानवे यांच्या नावावर आज शिक्कामोर्तब केले. या निवडीने भाजपने बहुजन चेहऱ्याला संधी देतानाच मराठवाड्यालाही मानाचे पान दिले आहे.
देवेंद्र फडणवीस यांनी राज्याचे मुख्यमंत्री म्हणून कारभार हाती घेतल्यानंतर भाजपच्या प्रदेशाध्यक्षपदासाठी चेहऱ्याचा शोध सुरू झाला होता. पक्ष पातळीवर अनेक नावांचा विचार करण्यात आला. त्यात भाजपचे मुंबई अध्यक्ष अॅड. आशिष शेलार आणि रावसाहेब दानवे यांची नावे सर्वात आघाडीवर होती. त्यामधून दानवे यांनी बाजी मारली आहे. दानवे हे गेल्या ३० वर्षांपासून भाजपमध्ये सक्रिय आहेत. मराठवाड्यामध्ये गोपीनाथ मुंडे यांच्या खांद्याला खांदा लावून त्यांनी संघटना वाढविण्यासाठी मेहनत घेतली. दानवे जसे दिवंगत मुंडे यांचे कट्टर समर्थक होते तसेच त्यांचे नितीन गडकरी यांच्याशीही सलोख्याचे संबंध राहिले आहेत. शिवाय बहुजन समाजातील चेहरा म्हणूनही दानवे यांच्या पारड्यात पक्ष श्रेष्ठींचे झुकते माप पडले.
दानवे यांच्या नावाची अधिकृत घोषणा आज अमित शहा यांच्या कार्यालयातून जाहीर करण्यात आली. दानवे सध्या केंद्रात राज्यमंत्रिपदही सांभाळत असून पक्षाने दिलेल्या नव्या जबाबदारीमुळे त्यांना केंद्रातील मंत्रिपदाचा त्याग करावा लागणार आहे. त्यामुळे महाराष्ट्रातील एका नव्या चेहऱ्यासाठीही केंद्रीय मंत्रिपदाची कवाडे लवकरच खुली होणार आहेत.