नागपूर – भूखंडाच्या नामांतरासंदर्भातील तक्रार निकाली काढण्यासाठी पाच लाख रुपयांची लाच घेणाऱ्या भूमी अभिलेख उपसंचालक दादासाहेब तळपे याला लाच लुचपत प‌‌्रतिबंधक विभागाने बुधवारी अटक केली. लाचेची रक्कम घरी ठेवण्यासाठी मध्यस्थी करणारा चपराशी भालचंद्र प्रल्हाद गलांडेही(२२ रा. गणेशपेठ) एसीबीच्या जाळ्यात अडकला आहे. एसीबीच्या पथकाने तळपे याच्या अमरावती मार्गावरील म्हाडा वसाहतीतील घर आणि पुण्यातील शास्‍त्रीनगर येथील घराची झडती सुरू केली आहे. लाच रुपात मोठी रक्कम स्वीकारण्याची अलीकडील ही पहिलीच घटना आहे. त्यामुळे भूमीअभिलेख कार्यालयात खळबळ उडाली आहे.
उद्योजक एन.कुमार यांची कुमार हॉटेल लिमिटेड व लिंक हाऊस इण्डस्ट्रीज आहे. अॅड.अमरेंद्रसिंग वर्मा (३२ रा.मिरे-ले-आऊट) कंपनीचे लिगल अॅडव्हायझर आहेत. २००१मध्ये कुमार यांनी सोनोने यांच्याकडून सीताबर्डीतील १५ हजार चौरसफूट भूखंड एक कोटी रुपयांमध्ये तर २००४ मध्ये उर्वरित पाच हजार चौरसफूट भूखंड ५० लाखांत खरेदी केला. हा भूखंड एन.कुमार यांच्या नावे झाला. २०१०मध्ये सोनोने यांनी भूमी अभिलेख कार्यालयात सीताबर्डीतील भूखंड आपण एन. कुमार यांना विकलेला नसून, त्यांचे नाव रद्द करावे याबाबत लेखी अर्ज केला. २०१२पासून याप्रकरणाचा युक्तीवाद चालू झाला. १० डिसेंबर २०१३ ला प्रकरणाची तारीख होती. अॅड. वर्मा तेथे गेले. त्यावेळी पाच लाख रुपये दिल्यास निकाल तुमच्या पक्षकाराच्या बाजूने लावून देतो, असे तळपे याने सांगितले. त्यानंतर १८ फेब्रुवारीला पुन्हा वर्मा तारखेवर गेले. पाच लाख रुपये दिले नाही तर निकाल तुमच्या बाजूने लागणार नाही,अशी धमकीही त्याने दिली. वर्मा यांनी एन. कुमार यांना याबाबत सांगितले. त्यानंतर वर्मा यांनी एसीबीकडे तक्रार केली. अधीक्षक निशिथ मिश्रा ,अतिरिक्त अधीक्षक संजय पुरंदरे यांच्या मार्गदर्शनाखाली उपअधीक्षक (वर्धा)अनिल लोखंडे, हेडकॉन्‍स्टेबल रमेश भोयर, शिपाई गिरीश कोरडे, नेरेंद्र पाराशर, निशिथ रंजन पांडे, मनीष घोडे, प्रदीपक कदम, रागिणी हिवाळे, प्रदीप देशमुख कोमल बिसेन यांनी बुधवारी सापळा रचला. वर्मा यांनी पैसे आणले. गलांडे यांच्यासोबत जा असे तळपे म्हणाला. वर्मा हे गलांडे याच्यासोबत म्हाडा वसाहतीत गेले. गलांडे याने रक्कम स्वीकारताच एसीबीने आधी त्याला व नंतर तळपे याला अटक केली.