जळगाव – वॉरन्ट बजावण्याचा बहाणा करीत ओळखीच्या महिलेला भेटण्यासाठी गेलेला पोलिस कर्मचारी दुसऱ्याच महिलेच्या घरात शिरला आणि त्याच्या असभ्य वर्तणुकीमुळे बिल्डींगमध्ये गुरुवारी रात्री एकच गोंधळ उडाला. या घटनेमुळे बिल्डींगमधील संतापलेल्या महिलांनी संबंधित पोलिसांला बेदम चोप दिला. अखेर बचावासाठी त्या पोलिसाला महिलांसमोर सपशेल शरणागतीच पत्करावी लागली.
सूरज पाटील असे पोलिसाचे नाव आहे. तो एमआयडीसी पोलिस ठाण्याच्या डीबी पथकात कार्यरत आहे. तो गुरुवारी रात्री साडे दहा वाजेच्या सुमारास शिरसोली नाक्यावरील एका अर्पाटमेंन्टमध्ये वॉरन्ट बजावण्यासाठी गेला. वॉरन्ट हे फक्त निमित्त होते. मात्र, त्या बिल्डींगमध्ये राहणाऱ्या व शहरात प्रसिध्द असलेल्या एका महिलेला भेटण्याच्या उद्देशाने तो याच भागात एकासारख्या दिसणाऱ्या रुबी अपार्टमेंटमधील दुसऱ्याच फ्लॅटमध्ये घुसला. त्या फ्लॅटमधील महिलेला सूरजने अश्लील भाषेत शिवीगाळही केली. संबंधित महिलेचा पती घरात असतांना सूरज थेट किचनमध्ये गेला. तेथे त्याने महिलेसोबत अश्लिल चाळे केले. याची माहिती परिसरातील नागरिकांना मिळाली आणि लगेच जमाव जमा झाला. जमावाला पाहून भांबावलेल्या सूरजने समन्सचा बहाणा केला. तसेच बोंब कराल तर मी आत्महत्या करेल, अशी धमकीही दिली. या प्रकाराने संतप्त महिलांनी सूरजला चोप दिला आणि त्याला घरात कोंडूनही ठेवले.