कोलकाता – लोकसभा निवडणूक जसजशी जवळ येत आहे तसे सर्वच पक्ष निवडणुकीच्या तयारीत मोठ्या प्रमाणात व्यस्त झालेले दिसून येत आहेत. देशात सर्वत्र पक्षांच्या प्रचारसभा सुरु आहेत. या प्रचारसभेमध्ये एकमेकांवर आरोपप्रत्यारोपाच्या फैरी झाडल्या जात आहे. या दरम्यान नेत्यांच्या आक्षेपार्ह विधांनांमुळे अनेक पक्षांना अडचणींनाही सामोरे जावे लागत आहे. याच पार्श्वभूमीवर आचारसंहितेचा भंग होणार नाही यासाठी तृणमूल काँग्रेसच्या कार्यकर्त्यांसाठी पक्षाकडून काय करावे आणि काय करु नये अशी एक सूचना यादी तयार करण्यात आली आहे.
महिलांनी लिपस्टिक लावू नये तसेच त्यांनी साडीवर मॅचिंग टिकली लावू नये. त्याचबरोबर पुढील दोन महिन्यासांठी पुरुषांनी रात्री उशिरापर्यंत कॅरम खेळू नये, दारु पिऊ नये अशा सूचना कार्यकर्त्यांना देण्यात आल्या आहेत. निवडणूकीत ममता बॅनर्जी पंतप्रधानपदाच्या प्रबळ उमेदवार मानल्या जात आहेत. त्यामुळे पक्षाची प्रतिमा मलीन होणार नाही यासाठी पक्षाकडून काळजी घेतली जात आहे. ममता यांच्या आदेशानंतरच कार्यकर्त्यांसाठी ही सूचनांची यादी तयार करण्यात आली. यात पक्षाने लोकांशी विन्रमतेने वागा, कोणत्याही गोष्टीबाबतचा दुराभिमान बाळगू नका तसेच उन्हाळ्यात सनग्लासेस घालू नका या आणि अशा ब-याच सूचना या यादीमध्ये देण्यात आल्या आहेत. त्याचबरोबर प्रचाराच्या वेळी महिलांनी मोठ्या प्रमाणात मेकअप करु नका, साधी रहाणी उच्च विचारसरणी असू द्या असेही यात सांगण्यात आले आहे