चेन्नई – अहो जरा बाहेर येता का? अशी साद एखाद्या महिलेने घातली आणि समोरून ‘म्याऊsss’ असा प्रतिसाद आला तर? ऐकून नवलच वाटेल पण चेन्नईतील एका महिलेने असा दावाच केला आहे की, तिच्या घरातील मांजर म्हणजे तिचा नवरा आहे.
१२ डिसेंबर रोजी जेव्हा सुपरस्टार रजनीकांतच्या वाढदिवसामुळे चेन्नईत प्रचंड उत्साह असतो अशा वेळी बी. इंद्राणी नावाची एक महिला मात्र आपले मांजर हरवले म्हणून नाराज होती. हे मांजर म्हणजे आपला नवरा आहे, असा या महिलाचा विश्वास आहे आणि म्हणूनच ते मांजर दिसत नाही तोपर्यंत तिला जेवणही नीट जात नव्हते. अखेर दोन आठवड्यांनी २६ डिसेंबर रोजी ते मांजर सापडले आणि तिचा जीव भांड्यात पडला.
१२ डिसेंबर २०१११ बी. इंद्राणी यांच्यासाठी अतिशय दु:खाचा दिवस होता. कारण याच दिवशी पोलीस विभागात कार्यरत असलेल्या त्यांच्या पतीचे निधन झाले होते. त्यानंतर बरोबर दहाव्या दिवशी एक मांजर त्यांच्या घरात आले. इंद्राणी यांनी त्या मांजराला दत्तक घेतलं आणि त्या मांजराचं नाव वेल्लची ठेवलं. जेव्हा इंद्राणी यांना त्यांच्या नवऱ्याची आठवण यायची तेव्हा वेल्लची त्यांचं मन त्या दु:खातून बाहेर काढत असे. हळूहळू त्यांच्यात एक अतूट नातं निर्माण झालं. म्हणूनच हे मांजर म्हणजे माझा नवरा आहे, असा दावा इंद्राणी यांनी केला आहे. हे मांजर इंद्राणी यांच्या गल्लीत देखील प्रसिद्ध आहे. इंद्राणी यांच्या परवानगीशिवाय हे मांजर कुणाकडे काहीही खात नाही. १२ डिसेंबर रोजी पशू पक्षी खाणाऱ्या जमातीतील काही लोक या मांजराच्या मागे लागले आणि त्यामुळेच हे मांजर हरवले. २६ डिसेंबर रोजी जेव्हा हे मांजर घरी परतले तेव्हा गल्लीतील लोकांनी प्रचंड जल्लोष केला. घराघरात मिठाई वाटली. सगळे लोक आनंद साजरा करण्यासाठी इंद्राणी यांच्या घरासमोर जमले होते. इंद्राणी यांचा मुलगा एन.बी.सेतुरामन याने देखील मांजर पुन्हा सापडल्याबद्दल आनंद व्यक्त केला आणि या मांजराबद्दलच्या काही जुन्या आठवणी देखील सांगितल्या.