यवतमाळ, दि. १० – यवतमाळ लगत असलेल्या किट्टा कापरा येथील वृद्घ महिलेच्या खून प्रकरणात चार संशयितांना पोलिसांनी ताब्यात घेतले आहे. चोरीतून हा खून झाल्याचा प्राथमिक अंदाज पोलिसांनी वर्तविला आहे. मात्र पोलिसांच्या हाती अद्याप पूरावा लागला नसून, बाळू घुडे, दिनेश राठोड, महादेव नेरकर, देवेंद्र घरकडे रा. सर्वजण किट्टाकापरा अशी चौकशी करण्यात आलेल्यांची नावे आहे.
यवतमाळ तालुक्यातील किट्टा कापरा येथे ८ फेबु्रवारीला किसनाबाई किसन देवकर (७२) या वृद्घ महिलेचा खून झाला होता. निराधार योजनेतून मिळणाºया पगारावर घराचा उदरनिर्वाह ती चालवित होती. गावातील काही गरजूना अडीअडचण आल्यास मदतही करीत होती. दरम्यान अज्ञात व्यक्तीने महिलेचा गळा आवळून हत्या केली. हत्येच्या दिवशी गावात शाळेमध्ये सांस्कृतीक कार्यक्रम सुरू होता. या कार्यक्रमाला महिला देखील गेली होती. मात्र कार्यक्रम अर्धवट सोडून महिला घरी परतली. तेव्हा तिच्या घरी चोरटा चोरी करीत होता. त्याच चोरट्याने महिलेचा गळा आवळून खून केलाचा धागा घेऊन पोलीस तपास करीत आहे. आज गावातीलच चार युवकांना पोलिसांनी चौकशीसाठी ग्रामीण पोलीस स्टेशनला आणले होते. चौकशीत पोलिसांच्या हाती काहीच लागले नसल्याची माहिती असून, आरोपीला अटक करण्यासाठी पोलिसांचे प्रयत्न सुरू असून, लवकरच आरोपीला अटक करण्यात येणार असल्याचे सांगण्यात आले आहे.