पांढरकवडा (यवतमाळ)-पूर्ववैमनस्यातून मारहाण करून तरुणीला जखमी करणाºया आरोपीला सहा महिन्याची शिक्षा व दहा हजाराचा दंड ठोठावण्यात आला. ही शिक्षा प्रथम वर्ग न्यायदंडाधिकारी यांनी सुनावली. विलास संभाजी पाटील (४४) रा. धारण असे शिक्षा झालेल्या आरोपीचे नाव आहे.
विलास पाटील व गौतम जगताप यांच्यात वाद होता. २७ जानेवारी २०१२ रोजी त्यांची मुलगी व पत्नी रात्री ८ वाजता दरम्यान बोलत होत्या. दरम्यान विलास याने पूर्ववैमनस्यातून वाद घालण्यास सुरूवात केली. यावेळी राग अनावर झाल्याने आरोपीने दगड भिरकावला. हा दगड गौतम जगताप यांच्या मुलीला लागून ती जखमी झाली. या घटनेची तक्रार पांढरकवडा पोलीस ठाण्यात देण्यात आली. पोलिसांनी चौकशी करून प्रकरण न्यायप्रविस्ट केले. सरकारी वकीलांनी पाच जणांच्या साक्षी तपासण्यात आल्या. आरोपीविरुद्ध गुन्हा सिद्ध झाल्याने प्रथम वर्ग न्यायदंडाधिकारी हितेंद्र वाणी यांनी आरोपीला सहा महिन्याची शिक्षा व दहा हजाराचा दंड सुनावला. दंडापैकी पाच हजाराची रक्कम फिर्यादी तरुणीला देण्याचे आदेश दिले. सरकारी पक्षाच्यावतीने राजकुमार गुप्ता यांनी काम बघितले.