युवतीचा विवाह मोडण्याचा प्रयत्न
तथाकथीत प्रियकराविरूद्घ गुन्हा
नेर – तालुक्यातील बाणगाव येथील एका युवतीचा विवाह मोडण्याचा प्रयत्न तथाकथीत प्रियकराकडून केल्याचा प्रकार नुकताच उघडकीस आला. तीच्या भावी पतीसोबत संपर्क साधून सदर मुलीसोबत माझे प्रेम असून ती माझी बायको होणार आहे अशी बतावणी केली. पोलिस ह्या तथाकथीत प्रियकराचा शोध घेत आहे.
बाणगाव येथील एका युवतीला बघण्यासाठी अकोला जिल्ह्यातील पातुर येथील दिनेश नामक युवक आला होता. सदर युवती पसंत आल्याचे सांगून तो आपल्या गावी परत गेला. दरम्यान काल गुरुवारी एका तथाकथीत प्रियकराने दिनेशला फोन करून माझे त्या युवतीसोबत माझे प्रेमप्रकरण सुरु असून ती माझी पत्नी आहे. तु तीच्यासोबत लग्न केले तर चांगले होणार नाही. तीचे वडील दारु पिणारे व जुगारी असून सदर सबंध मोडून टाका अशी धमकी दिली. दरम्यान आज दिनेशच्या कुटुंबीयानी हा प्रकार युवतीच्या वडीलांना सांगितला. याप्रकरणी नेर पोलिसांनी तथाकथीत प्रियकराविरूद्घ भादंवि कलम ५०९,६६ (अ), ६६ (ड) अंतर्गत गुन्हा दाखल केला. अधिक तपास प्रभारी ठाणेदार दिलीप वडगावकर यांच्या मार्गदर्शनाखाली जमादार शालीक लडके करीत आहे. या प्रकाराने युवतीची प्रकृती बिघडली असून आरोपीचा शोध घेऊन अटक करा अशी मागणी नागरिकांनी केली.