मारेगाव (यवतमाळ), दि. १४ – शाब्दीक वाद झाल्याने रागाच्या भरात काठीने मारहाण करून इसमाचा खून करण्यात आला. ही घटना मारेगाव तालुक्यातील देवाळा येथे आज दुपारी १ वाजता दरम्यान घडली. दिलीप जैतू येडमे (४०) असे मृताचे नाव आहे. याप्रकरणी गोपाळा रामचंद्र बोकडे (५०) यास अटक करण्यात आली.
दिलीप व गोपाळा यांच्यात शाब्दीक वाद निर्माण झाला. त्यामुळे रागाच्या भरात दिलीपच्या डोक्यावर काठीने प्रहार केला. डोक्याला गंभीर इजा झाल्याने घटनास्थळीच दिलीपचा मृत्यू झाला. या घटनेमुळे देवाळात एकच खळबळ उडाली. नागरिकांनी गोपाळा यास दोराने बांधून ठेवले. तसेच घटनेची माहिती मारेगाव पोलिसांना देण्यात आली. पोलीस निरीक्षक उमेश पाटील, सहाय्यक पोलीस निरीक्षक दत्तात्रय मदने, मंगेश भोयर, श्री. एफ. पाटील, जमादार भांदीकर, चव्हाण, आडे, राठोड , मोहाडे यांनी घटनास्थळ गाठले. आरोपीविरुद्ध गुन्हा दाखल करून गोपाळा यास अटक करण्यात आली. मृतकाच्या पश्चात पत्नी, मुलगा, मुलगी व बराच मोठा आप्त परिवार आहे.