कोल्हापूर- २०१२मध्ये स्वाभिमानी शेतकरी संघटनेकडून करण्यात आलेल्या ऊस दरवाढ आंदोलनादरम्यान जखमी झालेल्या पोलिस हेड कॉन्स्टेबल मोहन दिनकर पवार(५६, रा- लाईन बजार, कसबा बावडा) यांच्या मृत्यू प्रकरणी खासदार राजू शेट्टी यांच्यासह अन्य ८४ जणांवर खुनाचा गुन्हा दाखल करण्यात आला आहे. या प्रकरणी ७८वे आरोपी असलेल्या राजू शेट्टी यांच्यासह ८४ जणांवर शिरोली पोलिसांनी रविवारी रात्री गुन्हा दाखल केला आहे.
ऊस दरवाढीसाठी स्वाभिमानी शेतकरी संघटनेने नोव्हेंबर २०१२मध्ये आंदोलन केले होते. या आंदोलनादरम्यान पोलिस आणि स्वाभिमानी संघटनेचे कार्यकर्ते यांच्यात झटापट झाली होती. यात चार आंदोलकांसह पोलिस हेड कॉन्स्टेबल मोहन पवार जखमी झाले होते. पोलिस आणि आंदोलनकत्यांमध्ये झालेल्या झटापटीवेळी पवार यांनी हेल्मेट घातले होते. मात्र आंदोकरांनी ते काढून त्यांच्या डोक्यात लोखंडी सळीने हल्ला केल्याचे पोलिसांचे म्हणणे आहे. तसेच यासंदर्भात पुरावेही असल्याचा दावा पोलिसांनी केला आहे. या घटनेनंतर त्यांना खासगी रुग्णालयात दाखल करण्यात आले होते. दोन महिन्यांच्या उपचारानंतर त्यांना घरी सोडण्यात आले होते. मात्र काही दिवसांनंतर त्यांच्या नाकातून सतत पाणी येत होते. ऑगस्टमध्ये त्यांच्यावर शस्त्रक्रिया करण्यात येणार होती. मात्र की काही कारणामुळे पुढे ढकलण्यात आली होती. दरम्यान पवार कोमात गेले. त्यांच्यावर कदमवाडी येथील रुग्णालयात उपचार सुरु होते. रविवारी त्यांची प्राणज्योत मालवली. विशेष म्हणजे १२ नोव्हेंबर २०१२ रोजी झालेल्या या घटनेबद्दल पोलिसांनी अद्याप कोणतीही कारवाई केली नव्हती. मात्र रविवारी(नऊ फेब्रुवारी) पवार यांचा उपचारादरम्यान मृत्यू झाल्यानंतर पोलिसांनी याप्रकरणी गुन्ह्याचे स्वरुप बदलले आहे.दरम्यान, राजू शेट्टी यांनी पवार यांचा मृत्यू दुदैवी असल्याचे म्हटले आहे. तसेच स्वाभिमानी संघटनेच्या कार्यकर्त्यांचा पवार यांच्यावर जीवघेणा हल्ला हेतू नसल्याचे म्हटले आहे.