पुणे – थंडी, ऊन, पाऊस असा तिन्ही ऋतूंचा एकत्रित खेळ सुरू असलेल्या राज्यावर शनिवारी गारांचा मारा झाला. पुण्यासह राज्याच्या विविध भागांमध्ये गारांसह जोरदार पाऊस पडला. पुढील दोन दिवसात राज्यात कोकण वगळता अन्यत्र काही ठिकाणी पावसाची तर तुरळक ठिकाणी गारपिटीची शक्यता वर्तविण्यात आली आहे.
अफगाणिस्तान व पाकिस्तानच्या उत्तर भागात हवेच्या वरच्या थरात कमी दाबाचा पट्टा निर्माण झाला आहे. पाकिस्तानकडून वाहणारे थंड व कोरडे वारे आणि अरबी समुद्राकडून वाहणारे बाष्पयुक्त वारे यांचा संयोग होऊन राज्यात पाऊस होत आहे. काही ठिकाणी गारांसह पाऊस होत आहे. तर तामिळनाडू ते मध्य महाराष्ट्र व कर्नाटकच्या काही भागात हवेच्या वरच्या थरात कमी दाबाचे क्षेत्र निर्माण झाले आहे. यामुळे राज्यासह काही भागात सध्या पाऊस होत आहे.
मध्य महाराष्ट्र, उत्तर महाराष्ट्राचा काही भाग तसेच मराठवाडा आणि विदर्भाच्या काही भागात पावसाच्या सरींनी हजेरी लावली. यापैकी काही ठिकाणी गारांसह पाऊस झाला. पुण्यासह पिंपरी-चिंचवड परिसराला वादळी पावसाने झोडपले. तसेच काही ठिकाणी गारपीट झाली. सायंकाळी सहाच्या सुमारास वादळी वाऱ्यासह पावसाला प्रारंभ झाला. त्यामुळे अनेकांची धांदल उडाली. कोल्हापुरात विजांचा कडकडाट व गारांसह झालेल्या वळवाच्या पावसाने शनिवारी सायंकाळी शहराला जवळपास तासभर झोडपले. सांगली, सातारा जिल्ह्यात पावसाळी वातावरण तयार झाले मात्र पाऊस पडला नाही.