नवी दिल्ली – आम आदमीच्या कल्याणासाठी राजकारणाच्या आखाड्यात उतरलेले आम आदमी पक्षाचे नेते अरविंद केजरीवाल आज (मंगळवार) पुन्हा आम आदमीच्या संतापाचे लक्ष्य ठरले. दिल्लीच्या सुलतानपूर भागात रोड शो करणाऱ्या केजरींना एका सामान्य रिक्षावाल्याने कानफाटात हाणली. दिल्ली विधानसभेच्या निवडणुकीआधी दिलेली आश्वासने पूर्ण न केल्याच्या रागातून रिक्षावाल्याने हे कृत्य केल्याचे बोलले जात आहे.
उत्तर-पश्चिम दिल्लीतील लोकसभा मतदारसंघातील ‘आप’च्या उमेदवार राखी बिडलान यांचा प्रचार करण्यासाठी केजरीवाल दुपारी सुलतानपूर येथे गेले होते. रोड शोच्या माध्यमातून वाजतगाजत त्यांचा प्रचार सुरू होता. त्याचवेळी गर्दीतील एक व्यक्ती हार घालण्याच्या निमित्ताने केजरीवालांच्या जवळ आला आणि त्याने केजरींच्या गालात जोरदार थप्पड हाणली. यामुळे केजरींच्या डोळ्याला दुखापत झाली आहे. हा प्रकार लक्षात येताच ‘आप’च्या कार्यकर्त्यांनी केजरींवर हात उगारणाऱ्या व्यक्तीला चोप दिला आणि पोलिसांच्या ताब्यात दिले. या व्यक्तीचे नाव लाली असून तो दिल्लीतील अमन विहार परिसरात राहतो. लाली हा रिक्षाचालक आहे. दिल्लीकरांना मोठमोठी आश्वासने देऊन केजरीवाल यांच्या पक्षाने विधानसभा निवडणुकीत २८ जागा जिंकल्या होत्या. योगायोगाने, काँग्रेसच्या पाठिंब्यावर दिल्लीत केजरीवालांचे सरकारही स्थापन झाले. त्यामुळे त्यांच्याकडून दिल्लीकरांच्या अपेक्षा उंचावल्या होत्या. मात्र, जनलोकपालचे निमित्त करत अवघ्या ४९ दिवसांत केजरींनी सत्ता सोडली. त्यामुळे दिल्लीकरांमध्ये प्रचंड नाराजी आहे. लोकसभा निवडणुकीच्या निमित्ताने या नाराजीला तोंड फुटू लागल्याचे बोलले जात आहे.याआधी वाराणसी येथे प्रचार करताना केजरीवाल यांच्यावर ‘शाईहल्ला’ झाला होता. त्यानंतर दिल्लीतील दक्षिणपुरी भागात गाडीवर चढून एकाने केजरींना ठोसा लगावला होता. आज याचीच पुनरावृत्ती झाली. विशेष म्हणजे, याआधी केजरींवर हल्ला करणारे दोघेही ‘आप’चे कार्यकर्ते होते.