श्रीनगर – निवडणुकीदरम्यान मतदारांना प्रभावित करण्यासाठी राजकीय पक्षांकडून विविध माध्यमांचा मोठ्या प्रमाणावर वापर केला जातो. सोशल मिडीयाचा वाढता वापर पाहता सध्या निवडणुकीदरम्यान सोशल मिडीयावरुन प्रचार करण्याचे प्रमाणही वाढले आहे. मात्र त्यासोबतच रेडिओदेखील निवडणुकीत प्रचाराचे महत्त्वाचे माध्यम बनत आहे. जम्मू-काश्मीरमधील आगामी विधानसभा निवडणुकीत मतदारांना प्रभावित करण्यासाठी राज्यातील काँग्रेस, भाजपा यांसारख्या बड्या पक्षांकडून मोठ्या प्रमाणावर रेडिओचा वापर केला जात आहे.
भाजपाकडून रेडिओवरील चॅनेल्सवर पंतप्रधान नरेंद्र मोदींनी कारगिल येथे केलेले भाषण प्रसारित केले जात आहे. जम्मू-काश्मीर देशासाठी एक विकास मॉडेल बनले पाहिजे असे मोदींनी या भाषणात म्हटले होते. तसेच वृत्तपत्रातूनही मोठ्या प्रमाणात जाहिरात केली जात आहे. भाजपासोबतच काँग्रेसनेही रेडिओच्या माध्यमातून लोकांशी संवाद साधण्यास सुरुवात केली आहे. नॅशनल कॉन्फरन्स पक्षासोबतच्या युतीसोबत गेल्या सहा वर्षांत केलेल्या कामांचा प्रसार काँग्रेस रेडिओच्या माध्यमातून करत आहे.
लखनपूर ते लडाख हा चौपदरी रस्ता कोणी बांधला? काँग्रेसने. राज्याला रस्तेमार्गाने जोडण्यासाठी चेनानी आणि झोजिला येथे भुयारी मार्ग कोणी बांधले? काँग्रेसने. माझे मत फक्त काँग्रेसला अशा प्रकारची जाहिरात रेडिओद्वारे केली जात आहे. त्यासोबतच जम्मू-काश्मीरमधील शहरी भागातील उमेदवारही रेडिओच्या माध्यमातून निवडणुकीचा प्रचार करत आहेत.