कोलकाता- दुसरं द्विशतकं आणि सर्वाधिक २६४ धावा, असा विश्वविक्रमांचा ‘डबल धमाका’ करत भारताचा शैलीदार सलामीवीर रोहित शर्माने आज श्रीलंकेविरूद्धच्या लढतीत एकदिवसीय आंतरराष्ट्रीय क्रिकेटमध्ये नवा इतिहास रचला. याआधी भारताच्याच विरेंद्र सेहवागच्या नावावर एकदिवसीय सामन्यांतील सर्वाधिक २१९ धावांचा विक्रम होता. आतापर्यंत सचिन तेंडुलकर, सेहवाग आणि रोहित असे तीन भारतीय फलंदाजच एकदिवसीय क्रिकेटमध्ये दोनशे धावांची खेळी साकारण्याची किमया करू शकले आहेत.
कोलकात्याच्या ईडन गार्डन स्टेडियमवर रोहित शर्मा नावाच्या वादळाने श्रीलंकेची गोलंदाजी आज उद्ध्वस्त करून टाकली. रोहितने शतक झळकावल्यानंतर लंकेच्या गोलंदाजीवर जोरदार हल्ला चढवला. रोहितच्या आक्रमणापुढे कुलसेकरा, मेंडिस, मॅथ्यूज या अनुभवी गोलंदाजांचाही टिकाव लागू शकला नाही. रोहित षटकार आणि चौकारांची नॉनस्टॉप आतषबाजी करत सुटला होता. सलामीला आलेला रोहित ५० व्या म्हणजेच शेवटच्या षटकाच्या शेवटच्या चेंडूवर झेलबाद झाला. तेव्हा त्याच्या नावार १७३ चेंडूत २६४ धावांचा ‘एव्हरेस्ट’ लिहिला गेला होता. या विक्रमी खेळीत रोहितने ३३ चौकार आणि ९ षटकार ठोकले. रोहितच्या द्विशतकी खेळीच्या जोरावर भारताने ५० षटकांत ४०४ धावांचा डोंगर श्रीलंकेसमोर उभा केला आहे. भारतीय संघाची ही वनडेतील दुसरी सर्वात मोठी धावसंख्या ठरली आहे. याआधी भारताने सर्वाधिक ४१८ धावा वेस्ट इंडिजविरूद्ध केल्या आहेत. भारताच्या डावात कर्णधार विराट कोहलीनेही सुरेख अशी अर्धशतकी खेळी केली.