मुंबई – भाजपा नेते आणि महाराष्ट्राचे जलसंपदा मंत्री गिरीश महाजन कमरेला पिस्तुल लावून लहान मुलांच्या कार्यक्रमाला उपस्थित राहिल्याच्या मुद्यावरुन काँग्रेस-राष्ट्रवादी काँग्रेसने सोमवारी विधीमंडळाच्या दोन्ही सभागृहात राज्य सरकारला चांगलच धारेवर धरल.
काँग्रेस आणि राष्ट्रवादी काँग्रेसने विधानसभा आणि विधानपरिषदेत हा मुद्दा लावून धरत महाजन यांच्या राजीनाम्याची मागणी केली. गिरीश महाजन रविवारी जळगावमध्ये मूकबधीर मुलांच्या कार्यक्रमाला गेले होते. त्यावेळी त्यांनी कमरेला पिस्तुल लावल होत. कॅमे-याने महाजन यांचे हे पिस्तुल टिपले.
यावरुन विरोधकांनी सोमवारी सत्ताधा-यांची कोंडी केली. अशा प्रकारे महाजन यांच्या पिस्तुल लावण्यामुळे समाजात चुकीचा संदेश जातो त्यामुळे त्यांनी राजीनामा द्यावा अशी मागणी काँग्रेस-राष्ट्रवादीने केली.
या घटनेचा निषेध म्हणून विरोधकांनी प्रश्नोत्तराच्या तासावरही बहिष्कार घातला. यावर गिरीश महाजन यांनी आपण स्वसंरक्षणासाठी पिस्तुल बाळगत असल्याचा दावा केला. ते पिस्तुल माझ्याकडे होते. मात्र त्याने मी कुठलाही हिंसाचार केलेला नाही. मी फक्त स्वसंरक्षणासाठी पिस्तुल बाळगतो असा खुलासा महाजन यांनी केला.
महाजन यांच्याकडे गेल्या दोन दशकापासून पिस्तुल बाळगण्याचा परवाना आहे. त्यांनी कायदा मोडलेला नाही. विरोधक या विषयावरुन निरर्थक वाद निर्माण करत आहेत असे सांगत मुख्यमंत्री देवेंद्र फडणवीस यांनी महाजन यांचा बचाव केला. गिरीश महाजन महाराष्ट्र सरकारमध्ये मंत्री आहेत त्यांना पोलिसांची विशेष सुरक्षा व्यवस्था आहे असे असताना त्यांना वेगळे पिस्तुल बाळगण्याची गरजच काय ? हा प्रश्न निर्माण होतो