नगर – पाटबंधारे विभागातील कनिष्ठ लिपिकाला १५ हजार रुपयांची लाच घेताना अॅन्टी करप्शन ब्युरोच्या पथकाने बुधवारी रंगेहाथ पकडले. महादेव भागाजी बनकर असे या लिपिकाचे नाव असून, मेडिकल बिलातील त्रुटींची पूर्तता करून मेडिकल बिल नाशिक येथे पाठविण्यासाठी खात्यातील कर्मचाऱ्याला लाच मागितली होती.
पाटबंधारे विभागातील एका कर्मचाऱ्याने मेडिकल बिल बनकर याच्याकडे जमा केले होते. परंतु, या बिलातील त्रुटींटची पूर्तता करण्यासाठी व नाशिक येथे पाठवून देण्यासाठी बनकरने १५ हजार रुपयांची मागणी केली. ही तक्रार नगरच्या अँटी करप्शन ब्युरोकडे केल्यानंतर बुधवारी दुपारी नगर-औरंगाबाद रोडवरील सिंचन भवनसमोरील टी सेंटरसमोर सापळा रचण्यात आला. या ठिकाणी तक्रारदाराकडून पैसै स्वीकारताना पंचासमक्ष बनकर याला रंगेहाथ पकडण्यात आले. आरोपीविरुद्ध तोफखाना पोलिस स्टेशनला गुन्हा दाखल करून पोलिसांच्या ताब्यात देण्यात आले. पोलिस उपअधीक्षक अशोक देवरे यांच्या मार्गदर्शनाखाली पोलिस निरीक्षक विजय मुतडक, सुनील पवार, प्रमोद जरे, नितीन दराडे, श्रीपादसिंग ठाकून, एकनाथ आव्हाड, कल्हाण गाडे, राजेंद्र सावंत यांच्या पथकाने ही कारवाई केली आहे.