नगर – यंदाचा महाराष्ट्र केसरी होण्याचा मान जळगावचा कुस्तीपटू विजय चौधरी याने मिळवला आहे. १० हजारावर कुस्तीप्रेमींच्या गर्दीत झालेल्या अंतिम लढतीत विजयने पुण्याच्या सचिन येलबरला लोळवत ‘महाराष्ट्र केसरी’वर आपले नाव कोरले. या विजयानंतर ‘पैलवान आला गं पैलवान आला…’ या गाण्याच्या धूनवर विजयच्या चाहत्यांनी आखाड्यावर जल्लोष केला.
येथील वाडिया पार्कात स्वर्गीय पै. छबूराव लांडगे क्रीडा नगरीत ‘महाराष्ट्र केसरी’साठी विजय चौधरी आणि सचिन येलबर यांच्यात झुंज रंगली. मॅटवरच्या या लढतीत पहिल्यापासूनच वर्चस्व राखत विजयने विजयाला गवसणी घातली आणि आपणच मॅटचा बादशाह असल्याचे दाखवून दिले. विशेष म्हणजे विजय आणि सचिन या दोघाही कुस्तीपटूंना याआधी या पुरस्काराने हुलकावणी दिलेली आहे. याआधी दोघेही एकेकदा उपविजेते राहिलेले आहेत. आज विजयने सचिनवर मात करत आपलं स्वप्न साकार केलं.
विजयच्या विजयाने संपूर्ण उत्तर महाराष्ट्रच आनंदला आहे. कुस्तीच्या या मानाच्या स्पर्धेवर नेहमीच पश्चिम महाराष्ट्र आणि मुंबईतील कुस्तीपटूंचे वर्चस्व पहायला मिळाले आहे. आज जळगावकडे हे जेतेपद गेल्याने उत्तर महाराष्ट्रातील कुस्तीपटूंनीही ‘हम भी कुछ कम नाही’ असाच संदेश या माध्यमातून दिला आहे.