नागपूर – महाराष्ट्रात लोकसभा निवडणुकीच्या पहिल्या टप्प्याच्या प्रचाराच्या तोफा आज म्हणजे मंगळवारी संध्याकाळी पाच वाजता थंडावणार आहेत. महाराष्ट्रात विदर्भातील दहा लोकसभा मतदारसंघात पहिल्या टप्प्यात मतदान होत आहे.
महाराष्ट्रात पहिल्या आणि देशात तिस-या टप्प्याचे मतदान दहा एप्रिल रोजी होणार असून, विदर्भातील दहा जागांसाठी एकूण २०१ उमेदवार रिंगणात आहेत. देशाच्या राजकरणातील प्रमुख नेत्यांचे भवितव्य या निवडणुकीत निश्चित होणार आहे. प्रथमच लोकसभेची निवडणूक लढवणारे भाजपचे माजी राष्ट्रीय अध्यक्ष नितीन गडकरी आणि काँग्रेस नेते विलास मुत्तेमवार या लढतीकडे सगळयांचे लक्ष लागले आहे. ‘आप’च्या अंजली दमानियाही नागपूरमधून निवडणूक लढवत आहेत त्यांच्यामुळे ही निवडणूक चुरशीची बनली आहे.
केंद्रीय अवजड उद्योग मंत्री आणि राष्ट्रवादी काँग्रेसचे नेते प्रफुल पटेल भंडारा-गोदिंयामधून रिंगणात आहेत. त्यांच्यासमोर भाजपचे नाना पाटोले यांचे आव्हान आहे. काँग्रेसचे वरिष्ठ नेते मुकुल वासनिक रामटेकमधून, राज्य सरकारमधील काँग्रेसचे मंत्री शिवाजीराव मोघे यवतमाळ-वाशिममधून, संजय देवतेळ चंद्रपूरमधून रिंगणात आहेत. वर्धा, अकोला, गडचिरोली, अमरावतीमधून काँग्रेस, राष्ट्रवादी काँग्रेसचे उमेदवार आपले नशीब आजमवत आहेत. २०१ उमेदवारांमध्ये ९० अपक्ष उमेदवार असून यामध्ये १५ महिलांचा समावेश आहे. ८० नोंदणीकृत राजकीय पक्षांचे उमेदवार आहेत. एकूण १ कोटी २१ लाख ७५ हजार ६६२ मतदार या उमेदवारांचे भवितव्य निश्चित करणार आहेत. विदर्भातील दहा जागांसाठी काँग्रेसने सात, राष्ट्रवादीने तीन, भाजपने सहा, शिवसेनेने चार, सीपीआयने एक आणि बसपने सर्वच्या सर्व दहा जागांवर आपले उमेदवार उभे केले आहेत.नागपूर लोकसभा मतदारसंघातून सर्वाधिक ३३ आणि अकोल्यातून सर्वात कमी म्हणजे सात उमेदवार रिंगणात आहेत. प्रचाराचा अंतिम टप्पा असल्याने सर्वच पक्षांचे प्रमुख नेते विदर्भात आपआपल्या उमेदवारांचा जोरदार प्रचार करत आहेत.
देशात दुस-या टप्प्यात म्हणजे दहा एप्रिलला महाराष्ट्र दहा , ओरिसा दहा , उत्तर प्रदेश दहा, अंदमान आणि निकोबार एक, चंदीगड एक, लक्षद्वीप एक, दिल्ली सात जागा, बिहारच्या सहा, छत्तीसगड एक, हरियाणा दहा, जम्मू आणि काश्मीर एक, झारखंड चार, केरळ वीस आणि मध्यप्रदेशच्या नऊ जागांवर मतदान होईल.