जळगाव – परदेशातील हॉटेलमध्ये मॅनेजरच्या पदावर नोकरी लावून देण्याच्या आमिषाचे ईमेल पाठवून कासोदा (ता. एरंडोल) येथील दोन तरूणांची २६ लाखांची फसवणूक केल्याची घटना मंगळवारी उघड झाली आहे. याप्रकरणी जिल्हापेठ पोलिसात गुन्हा दाखल करण्यात आला आहे.
कासोदा येथील भूषण जाधव व मुकेश तायडे या दोघाही तरूणांनी हॉटेल मॅनेजमेंटचा अभ्यासक्रम पूर्ण केला होता. दोघांनी इंटरनेटच्या माध्यमातून हॉटेल करीअर जॉब या साईटवर स्वतःचा बायोडाटा अपलोड केला होता. काही दिवसातच या दोघांच्या मेलवर लंडन येथील ब्रेन मार्ट शहरातून मेल आला. त्यात ‘आमच्याकडे मॅनेजर पदापासून ते वेटर पदापर्यंतच्या जागांसाठी व्हॅकेन्सी असल्याने आपण त्यासाठी अर्ज करावा.’ असा उल्लेख होता. त्यानंतर या जॉबसाठी २५ हजार ५०० रुपये इतकी नोंदणी फी आयसीआयसी बँकेच्या खात्यातून एका दुसऱ्या खात्यावर भरण्यास सांगण्यात आले. त्यानुसार या दोघांनी ५० हजार रुपये संबधीत खात्यात टाकले. फेब्रुवारी मह‌िन्यापासून या दोघा तरूणांना इंटरनेटवरून वेगवेगळे मेल गेले. त्यानंतर दोघा तरूणांनी ५७ हजार रुपये जमा केले. त्यानंतर पुन्हा पैशांची मागणी करण्यात आली. ५ डिसेंबरपर्यंत या दोघा तरूणांनी तब्बल २६ लाख ८६ हजार रूपयांची रक्कम बँकेच्या खात्यात जमा केली. त्यानंतर या दोघांकडे पुन्हा पैशांची मागणी करण्यात आल्यानंतर या दोघांनी आम्हाला तुम्हाला भेटायचे आहे, असे सांग‌ितल्याने या दोघांना १६ डिसेंबरला दिल्ली येथे बोलाविण्यात आले. दिल्लीला हे दोघेही तरूण गेल्यानंतर त्यांना कोणीही भेटले नाही.
त्यामुळे दोघांनाही शंका आली. याच काळात अशीच एक तक्रार मुंबई पोलिसांकडे देखील दाखल करण्यात आली होती. मुंबई पोलिस आरोपींचा शोध घेत होते. आरोपींनी ज्या मोबाईल क्रमांकावरून या तरूणांशी संवाद साधला होता. त्या मोबाईल क्रमांकाचे डिटेल्स काढल्यानंतर पोलिसांना कासोद्याच्या दोघा तरूणांना नंबर मिळाला. त्यानंतर त्यांनी पोलिसांना घडलेला प्रकार सांगितला.