नवी दिल्ली – परजातीय मुलाशी विवाह करणाऱ्या दिल्ली विद्यापीठाच्या श्री व्यंकटेश्वर कॉलेज या नामांकित कॉलेजातील विद्यार्थिनीची तिच्या आई-वडिलांनीच हत्या केली आहे. १५ नोव्हेंबरला घडलेला हा धक्कादायक प्रकार ‘ऑनर किलिंग’ असल्याचे पोलिसांचे म्हणणे आहे. पोलिसांनी तिच्या चुलत्यावरही संशय व्यक्त केला आहे.
हत्या केल्यानंतर तिच्या मृतदेहावर या कुटुंबाने मूळ गावी अंत्यसंस्कारही केले. या प्रकरणी मुलीची आई सावित्री व वडील जगमोहन यांना अटक करण्यात आली असून, वडील काँग्रेसचे स्थानिक पदाधिकारी व प्रॉपर्टी डिलर आहेत. भावना यादव (वय २१) असे या तरुणीचे नाव आहे. तिने अभिषेक सेठ (वय २४) या तरुणाशी १२ नोव्हेंबर रोजी दिल्लीतील आर्य समाज मंदिरात विवाह केला होता. भावना मूळची राजस्थानची, तर अभिषेक पंजाबी कुटुंबातील आहे.
विवाहानंतर ‘झाले गेले विसरून जा’ असे सांगून भावनाच्या कुटुंबीयांनी तिला घरी बोलावले. त्या दोघांचे पुन्हा पारंपरिक पद्धतीने लग्न लावून देण्याचे आश्वासनही देण्यात आले. मात्र, घरी गेल्यानंतर तिच्या आई-वडिलांनी तिला त्रास देण्यास सुरूवात केली. त्यानंतर भावना पुन्हा अभिषेकच्या घरी राहायला गेली. मात्र, आई-वडिलांनी तिला पुन्हा समजावल्याने काही दिवसांपूर्वीच ती माहेरी आली होती. दरम्यान, १५ नोव्हेंबर रोजी भावनाचे काका लखन याने आम्हा दोघांनाही धमकी दिल्याचे अभिषेकचे म्हणणे आहे. त्याच रात्री (१५ नोव्हेंबर) भावनाच्या आई-वडिलांनी तिची हत्या केली. तशी कबुलीही त्यांनी पोलिसांकडे दिली आहे. आम्ही तिचे लग्न आमच्या जातीतील एका मुलाशीच करण्याचे ठरवले होते. हा नियोजित साखरपुडा २२ नोव्हेंबर रोजी होता, अशी माहितीही त्यांनी दिल्याचे सहायक पोलिस आयुक्त तेजेंद्र लुथरा यांनी सांगितले. दिल्ली विद्यापीठातील श्री व्यंकटेश्वर कॉलेजमध्ये भावना तिसऱ्या वर्षाला होती, तर अभिषेक राष्ट्रपती भवनात कंत्राटी प्रोग्रॅमर आहे.
म्हणे, सर्पदंशाने मृत्यू
हत्येनंतर भावनाचे आई-वडील जगन्नाथ आणि सावित्री यांनी गाडीतून भावनाचा मृतदेह राजस्थानमधील अलवर येथे नेला. ‘भावनाला साप चावला आहे आणि आयुर्वेदिक उपचार करण्यासाठी तिला मूळ गावी नेत आहोत,’ असे आई-वडिलांनी शेजाऱ्यांना सांगितले होते; मात्र, गावी गेल्यावर ‘रस्त्यातच भावनाचा मृत्यू झाला,’ असे त्यांनी गावातील नातेवाईकांना सांगितले.