यवतमाळ , दि. ३१ – माहेरी राहत असलेल्या महिलेचा विनयभंग केल्याप्रकरणी आरोपीस एक महिना कारावासाची शिक्षा येथील प्रश्रम श्रेणी न्यायदंडाधिकारी एस.के. शाहु यांनी सुनावली. विष्णू बाबाराव चव्हाण (३०) रा. आसोला असे आरोपीचे नाव आहे.
पतीसोबत घरगुती कारणावरून वाद होत असल्याने एक महिला माहेरी आसोला येथे राहत होती. गावातीलच विष्णू चव्हाण या युवकाची वाईट नजर सदर महिलेवर पडली होती. या महिलेने आरोपीला समज देऊन समजुत काढली होती. अशातच १९ आॅक्टोंबर २०१३ रोजी महिलेचे आई वडील कामानिमित्त बाहेरगावी गेले होते. याच संधीचा फायदा घेऊन दारू पिऊन आरोपीने घरात प्रवेश करून महिलेचा विनयभंग केला. याप्रकरणी यवतमाळ ग्रामीण पोलिसांनी आरोपीविरूद्घ भादंवि कलम ३५४ (अ) अंतर्गत गुन्हा दाखल केला. जमादार माणिक भगत यांनी तपासाअंती आरोपीस अटक करून प्रकरण न्यायप्रविष्ट केले. येथील प्रथमश्रेणी न्यायदंडाधिकारी (तीसरे) एस.के. शाहु यांच्या न्यायालयात या प्रकरणाची सुनावणी पार पडली. यामध्ये सरकारी पक्षाच्या वतीने चार साक्ष तपासण्यात आल्या. यामध्ये दोष सिद्घ झाल्याने आरोपीस एक महिना सश्रम कारावासाची शिक्षा ठोठावली. सरकारी पक्षाच्या वतीने सहाय्यक सरकारी अभियोक्ता अमित भेंडे यांनी काम पाहिले.