नवी दिल्ली – घरगुती गॅस सिलिंडर ग्राहकांना नव्या वर्षांचं गिफ्ट देत सरकारने विना-अनुदानित सिलिंडर आणखी स्वस्त केलं आहे. विना-अनुदानित सिलिंडर ४३ रुपये ५० पैशांनी स्वस्त करण्यात आलं आहे. आंतरराष्ट्रीय बाजारात कच्च्या तेलाच्या किंमती घसरल्याने सिलिंडरचे दरही कमी झालेत. आता बाजारात १४.२ किलोचं विना-अनुदानित सिलिंडर ७०८ रूपये ५० पैशांना मिळेल. आधी याची किंमत ७५२ रुपये होती. ऑगस्ट २०१४ पासून विना-अनुदानित सिलिंडरच्या दरात ही पाचव्यांदा कपात करण्यात आली आहे. विना-अनुदानित सिलिंडरचे दर गेल्या १ डिसेंबरमध्ये ११३ रुपयांनी कमी करण्यात आले होते.
अनुदानित सिलिंडरच्या दरात कुठलिही कपात करण्यात आलेली नाही. त्याचे दर जैसे थे ठेवण्यात आले आहेत. आजपासून गॅस सिलिंडरचे अनुदान थेट बँक खात्यात जमा होणार असल्याने अनुदानित सिलिंडरही ग्राहकांना बाजार भावानेच घ्यावा लागणार आहे. तर रेशन दुकानांवरुन दिल्या जाणाऱ्या रॉकेल आणि गॅस सिलिंडरच्या विक्रीतून होत असलेला तोटाही कमी झाला असल्याची माहिती सरकारनं दिली आहे. २०१४-१५ मध्ये पेट्रोलियम उत्पादनांच्या विक्रीतील तोटा हा ५१ हजार ११० कोटी रुपये झाला. तर २०१३-१४ मध्ये आर्थिक वर्षात हा तोटा १ लाख ३९ हजार ८६९ रूपये होता, अशी आकडेवारी पेट्रोलियम मंत्रालयाने दिली आहे.