नवी दिल्ली : ‘आऊटलूक’ ग्रुपचे संस्थापक, संपादक विनोद मेहता यांचं निधन झालं आहे. दिल्लीतील एम्समध्ये हृदयविकाराच्या तीव्र झटक्याने त्यांनी वयाच्या 73 वर्षी अखेरचा श्वास घेतला.
त्यांनी त्यांच्या कारकीर्दीत सुरुवात ‘सण्डे ऑब्जर्व्हर’, ‘द पायनिअर’ आणि ‘आऊटलूक’ यांसारख्या मासिकांमध्ये काम केलं. त्यांनी अनेक पुस्तकही लिहिली आहेत. भारतीय पत्रकारिता क्षेत्रात विनोद मेहता यांचं नाव आदराने घेतलं जातं. देशातील वरिष्ठ पत्रकारांमध्ये त्यांचा समावेश होतो. विनोद मेहता न्यूज चॅनलमध्ये पॅनलिस्ट म्हणूनही दिसायचे. त्यांनी पत्रकारांची संस्था ‘एडिटल गिल्ड’चं अध्यक्षपदही भूषवलं आहे. मेहता वयाच्या 73 वर्षीही पत्रकारितेत सक्रीय होते. विनोद मेहता त्यांच्या बिनधास्त आणि बेधडक मतांसाठी ओळखले जात होते. विनोद मेहता हे पत्रकार तर होतेच पण त्यांची ओळख एक चांगला लेखक आणि विचारवंत अशीही होती. विनोद मेहता यांनी सोनिया गांधींवर पुस्तक लिहिलं आहे. विशेष म्हणजे त्यांच्या कुत्र्याचं नावही ‘एडिटर’ होतं.