‘कम्युनिकेशन सपोर्ट’ व डिजिटल एम्पॉवरमेंट फाउंडेशनचा प्रयोग
पुणे – दत्तक घेतलेल्या मुलाचे किंवा मुलीचे लग्न कसे होणार, हा अनेक पालकांना सतावणारा प्रश्न आता चुटकीसरशी सुटणार आहे. खास दत्तक विवाहेच्छुक मुला-मुलींसाठी ‘मॅट्रिमोनी फॉर अॅडॉप्टेड’ या वेबसाइटची निर्मिती करण्यात आली.कम्युनिकेशन सपोर्ट फाउंडेशन आणि डिजिटल एम्पॉवरमेंट फाउंडेशन या दोन संस्थांनी मिळून या वेबसाइटची निर्मिती केली आहे. दत्तक विवाहेच्छुक मुलांच्या विवाहाचा प्रश्न सोडविण्यासाठीच्या या अभिनव प्रकल्पाची माहिती प्रदीप दीक्षित आणि रवी घाटे यांनी पत्रकार परिषदेत दिली.
‘जागतिकीकरण, महिला सक्षमीकरण अशा मुद्द्यांवर चर्चा करणारा समाज दत्तक मुलाचे किंवा मुलीचे स्थळ आल्यावर एक पाऊल मागे जाऊन विचार करू लागतो. लग्नाच्या बाजारात दत्तक मुलींच्या संदर्भात हा प्रश्न अधिकच गंभीर आहे. दत्तक असल्याने विवाह होत नसल्याचे अनेक मुलांच्या बाबतीत पाहण्यात आल्याने हा प्रश्न सोडविण्यासाठी अशा वेबसाइटची निर्मिती होणे ही काळाची गरज होती. ही गरज पूर्ण करण्याचा प्रयत्न करण्यात आला आहे,’ असे दीक्षित म्हणाले. देशात विवाह नोंदणीच्या असंख्य वेबसाइट इंटरनेटवर उपलब्ध आहेत. मात्र, केवळ दत्तक विवाहेच्छुकांसाठीची ही पहिली वेबसाइट असल्याचा दावा दीक्षित आणि घाटे यांनी केला. दत्तक घेण्याविषयी जागृती वाढत असल्याचे सांगून, दीक्षित यांनी या वेबसाइटमुळे जगभरातील दत्तक विवाहेच्छुक एका व्यासपीठावर येण्यास मदत होणार असल्याचे सांगितले. http://matrimonyforadopted.org/ हा वेबसाइटचा पत्ता आहे.