नवी दिल्ली -‘मराठी हा आत्मा’ असलेली शिवसेना आता महाराष्ट्राबाहेरील राजकीय अवकाशात ‘हिंदुत्वाचा श्वास’ घेण्यास सज्ज झाली आहे. त्याचाच भाग म्हणून दिल्ली आणि जम्मू-काश्मीरमधील आगामी विधानसभा निवडणूक लढविण्याचा निर्णय शिवसेनेने घेतल्याचे सूत्रांकडून समजते.
मराठी माणसाच्या न्याय्य-हक्कांसाठी स्थापन झालेल्या शिवसेनेने नव्वदच्या दशकापासूनच हिंदुत्वाचा अजेंडा हाती घेऊन व्यापक होण्याचा प्रयत्न सुरू केला होता. दिवंगत बाळासाहेब ठाकरे यांच्या जहाल भूमिकांमुळे महाराष्ट्राबाहेर शिवसेनेला मानणारा एक वर्ग आहे. गुजरात, राजस्थान, दिल्ली, जम्मू-काश्मीर व मध्य प्रदेशसारख्या राज्यांत शिवसेनेच्या शाखाही आहेत. याच शाखांचा विस्तार करून राष्ट्रीय राजकारणात पाय रोवण्याचा शिवसेनेचा विचार आहे.
शिवसेनेचे पक्षप्रमुख उद्धव ठाकरे यांचे चिरंजीव व युवा सेनाप्रमुख आदित्य ठाकरे यांनी याआधीच त्यादृष्टीने प्रयत्न सुरू केले आहेत. आदित्य यांच्या नेतृत्वाखालील युवा सेनेने राजस्थानातील काही महाविद्यालयांत निवडणुकाही लढवल्या आहेत. त्यांच्या नेतृत्वाला राष्ट्रीय पातळीवर अधिक वाव मिळावा, असा शिवसेनेचा प्रयत्न आहे. त्यामुळेच दिल्ली व काश्मीरच्या निवडणुका लढण्याची तयारी पक्ष करत असून उद्धव ठाकरे लवकरच याबाबतीत अधिकृत घोषणा करतील, असे एका ज्येष्ठ नेत्याने सांगितले.
शिवसेनेच्या राष्ट्रीय महत्त्वाकांक्षेला महाराष्ट्रातील सत्ताकारणाचा सध्याचा तिढाही कारणीभूत असल्याचे सांगितले जाते. महाराष्ट्रात भाजपने राष्ट्रवादीच्या साथीने शिवसेनेची कोंडी केली असून विरोधी पक्षात बसायला भाग पाडले आहे. ही कोंडी फोडण्याची संधी शिवसेना शोधत असून दिल्ली व जम्मू-काश्मिरच्या निवडणुकांनी ती दिली आहे. येथे शिवसेनेने निवडणुका लढल्यास हिंदुत्ववादी मतांमध्ये फूट पडू शकते. ते भाजपला परवडणारे नाही. याची जाणीव असलेल्या शिवसेनेने महाराष्ट्राबाहेर भाजपचे नाक दाबून महाराष्ट्रात सत्तेचे दार उघडायचे अशी खेळी केली असावी, असे राजकीय जाणकारांचे मत आहे.