मुंबई – शिवसेनेचे अध्यक्ष उध्दव ठाकरे आणि मनसेचे अध्यक्ष राज ठाकरे यांच्यामध्ये रंगलेल्या शाब्दीक व्दंदाची परिणीती आता रस्त्यावर कार्यकर्त्यांमध्ये हाणामारीमध्ये झाली आहे.
गुरुवारी मुंबईतील ओल्ड कस्टम हाऊस येथे उमेदवारी अर्ज दाखल करण्याच्या निमित्ताने समोरासमोर आलेले दोन्ही पक्षांचे कार्यकर्ते परस्परांना भिडले. दक्षिण मुंबईचे शिवसेना उमेदवार अरविंद सावंत आणि दक्षिण मध्य मुंबईचे मनसे उमेदवार आदित्य शिरोडकर गुरुवारी सकाळी ओल्ड कस्टम हाऊस येथे उमेदवारी अर्ज दाखल करण्यासाठी आले होते. त्यावेळी दोन्ही पक्षांचे कार्यकर्ते समोरासमोर आले.
घोषणाबाजीतून सुरु झालेला खुन्नस हाणामारीमध्ये बदलली. पोलिसांना न जुमानता दोन्ही बाजूंचे कार्यकर्ते हातातील झेंडे घेऊन परस्परांवर तुटून पडले. यावेळी दोन्ही बाजूंकडून जोरदार दगडफेकही झाली. दोन्ही पक्षांचे अनेक कार्यकर्ते या हाणामारीत जखमी झाले आहेत. ओल्ड कस्टम हाऊसच्या बाहेरच्या परिसराला शिवसेना आणि मनसेने रणमैदान बनवून टाकले होते.दोन्ही बाजूंच्या कार्यकर्त्यांना पांगवण्यासाठी पोलिसांना लाठीमारही करावा लागला. शिवसेना-मनसेच्या स्थानिक नेते-कार्यकर्त्यांना पोलिसांनी अटक केली आहे. दरम्यान या हाणामारीतनंतर परिसरात मोठया प्रमाणावर पोलिस बंदोबस्त तैनात करण्यात आला आहे.उमेदवारी अर्ज भरताना दोन्ही बाजूंनी शक्ती प्रदर्शन केल्याने मोठया संख्येने कार्यकर्ते जमले होते. त्यामुळे दोन्ही बाजूंच्या कार्यकर्त्यांना रोखणे पोलिसांच्या हाताबाहेर गेले. उध्दव ठाकरे आणि राज ठाकरे यांच्यामध्ये सध्या प्रश्न-उत्तराचा सिलसिला रंगला आहे. दोन्ही नेते परस्परांवर व्यक्तीगत स्तरावराचे आरोप-प्रत्यारोप करत आहेत. त्यांच्या या आक्रमक भाषणांनी कार्यकर्त्यांमध्ये खुन्नसही वाढू लागला आहे.