मुंबई- मुंबई शेअर बाजाराच्या निर्देशांकाने बुधवारी बाजाराला सुरुवात होताच उच्चांकी पातळी गाठली. निर्देशांक २२,१६२.५२ या उच्चांकी पातळीवर पोहोचला. राष्ट्रीय शेअर बाजाराचा निर्देशांक निफ्टीही ६ हजार ६०० अंकाच्या वर आहे.
परदेशी संस्थात्मक गुंतवणूकदारांची मेहेरनजर असल्याने गेल्या काही सत्रांपासून सेन्सेक्स रोज नवी शिखरे पादाक्रांत करत आहे. निर्देशांकाने जानेवारी महिन्यात गेल्या दोन वर्षांमध्ये पहिल्यांदाच २० हजार अंकाचा टप्पा गाठला. त्यात दिवसेंदिवस वाढ होत आहे. चालू आठवड्यात बँकांच्या शेअरची मोठ्या प्रमाणात झालेल्या खरेदीने सोमवारी सेन्सेक्सने त्रिशतकी झेप घेतली. तो २२,०५५.४८ अंकांच्या नव्या शिखरावर बंद झाला. तसेच राष्ट्रीय शेअर बाजाराच्या निफ्टीतही ८८.६० अंकांची वाढ झाली आणि तो ६,५८३.५० वर बंद झाला. मंगळवारी सेन्सेक्स केवळ ०.२७ अंकांच्या घसरणीसह २२,०५५.२१ वर बंद झाला होता. तर निफ्टीत मात्र ६.२५ अंकाची वाढ होऊन तो ६,५८९.७५ वर बंद झाला. बाजारामध्ये सध्या तेजीचे वातावरण असून गुंतवणूकीसाठी चांगली संधी असल्याचे जाणकारांचे मत आहे. आता नवीन वर्षांत तेजीचा नवा उच्चांक स्थापन केला जाईल, असा अंदाज आहे.