मुंबई, दि. 21 – नैसर्गिक संकटांनी होरपळून निघालेल्या राज्यातील शेतक-यांना तातडीची भरीव मदत व आंतरराष्ट्रीय बाजारातील घसरत्या किंमतींच्या प्रमाणात देशातील पेट्रोल-डिझेलच्या दरकपात मागणी तसेच भू-संपादन कायद्यातील शेतकरी विरोधी दुरूस्त्यांना विरोध करण्यासाठी काँग्रेस पक्षाने दि. 21 जानेवारी 2015 रोजी संपूर्ण महाराष्ट्रात तीव्र निदर्शने केली.
या तीनही मुद्यांवर महाराष्ट्र प्रदेश काँग्रेस कमिटीने दि. 21 जानेवारीपासून दि. 25 जानेवारी पर्यंत जिल्हा आणि तालुकास्तरावर निदर्शने करण्याचा निर्णय घेतला होता. त्यानुसार आंदोलनाच्या पहिल्या दिवशी राज्यात प्रामुख्याने जिल्हा मुख्यालयांच्या ठिकाणी भारतीय जनता पक्षाच्या केंद्रातील व राज्यातील सरकारविरूद्ध आंदोलन करण्यात आले.
दि. 21 जानेवारी 2015 रोजी रायगड, रत्नागिरी, सिंधुदूर्ग, उल्हासनगर, ठाणे, नवी मुंबई, नाशिक, जळगाव, कोल्हापूर, पुणे, बुलडाणा, वाशिम, अकोला, अमरावती, गडचिरोली, चंद्रपूर, परभणी, उस्मानाबाद, नांदेड, लातूर आदी ठिकाणी काँग्रेसच्या शेकडो कार्यकर्त्यांनी जिल्हाधिकारी कार्यालय, अन्य शासकीय कार्यालये, पेट्रोल पंपांवर आंदोलन करून नागरिकांचे लक्ष वेधले. दि. 22 जानेवारीपासून तालुका पातळीवर आंदोलन केले जाणार आहे.