मराठी चित्रपटांनी गेल्या काही वर्षांत उमटवलेला ठसा तसेच बॅाक्स आॅफिसवर मिळवलेले घवघवीत यश त्यामुळे हिंदीतले अनेक मराठी चेहरे मराठी चित्रपटांकडे वळले आहेत. गेली काही वर्षे हिंदीत रमलेला सुमीत राघवनही आता मराठी चित्रपटांत पदार्पण करण्यास सज्ज झाला आहे. ‘ओरँजेन एंटरटेनमेंट’चे विशू गायकवाड आणि मंदार केणी यांची निर्मिती असलेल्या ‘संदूक’मधून सुमीत मराठी चित्रपटांत प्रथमच नायकाच्या भूमिकेत झळकणार असून आजवर अनेक यशस्वी मराठी चित्रपटांचा अनुभव गाठीशी असलेला अतुल काळे याचे दिग्दर्शन या चित्रपटाला लाभणार आहे.
१९४०च्या दशकातील गोष्ट मांडणारा ‘संदूक’ विनोदी चित्रपट आहे. मराठी रंगभूमीवरून पदार्पण केलेला आणि नंतर हिंदीत आपला ठसा उमटवणारा सुमीत राघवन ‘संदूक’मधून प्रथमच मराठीत नायकाच्या भूमिकेत दिसणार आहे. एप्रिल महिन्यात या चित्रपटाच्या चित्रीकरणाला सुरुवात होणार असून सुमीतला शरद पोंक्षे, अरुण नलावडे यांसारख्या कसदार अभिनेत्यांची भक्कम साथ लाभणार आहे. ‘मातीच्या चुली’, ‘दे धक्का’, ‘शहाणपण देगा देवा’, ‘तिचा बाप त्याच बाप’ आणि ‘असा मी अशी ती’ यांसारख्या यशस्वी चित्रपटानंतर ‘संदूक’मधून प्रथमच गतकाळ उभा करणारा दिग्दर्शक अतुल काळे म्हणतो, “‘संदूक’ हे माझं ब-याच वर्षांपासूनचं स्वप्न आहे. शक्य असतं तर माझा पहिला चित्रपट म्हणून ‘संदूक’च बनवणं मला आवडलं असतं. माझं हे स्वप्न सत्यात उतरण्यासाठी १२ वर्षं लागली आहेत. त्यामुळे मी अर्थातच आनंदी आहे आणि आघाडीचे कलाकार आणि तंत्रज्ञांची साथ या स्वप्नाला लाभणं हा माझ्यासाठी दुग्धशर्करा योग आहे. सुमीतशी माझी गेल्या दोन दशकांहून अधिक काळ मैत्री असून ‘संदूक’साठी अन्य कोणत्याच नावाचा विचार करणं मला अशक्य होतं.” यासंदर्भात सुमीत म्हणतो, “‘संदूक’ माझ्यासाठी वैशिष्ट्यपूर्ण आहे. एकतर हा माझा पहिला मराठी चित्रपट आहे. दुसरं म्हणजे माझा बालपणापासूनचा मित्र अतुल काळे याच्या दिग्दर्शनात मला काम करायला मिळणार आहे. आणि हा खूप भव्य, महत्त्वाकांक्षी चित्रपट आहे. माझ्या समविचारी सहका-यांसोबत लवकरात लवकर चित्रीकरण सुरू करण्यासाठी मी उत्सुक आहे. इतक्या वर्षांची प्रतीक्षा फळाला आली, असं मी म्हणेन.” विशू गायकवाड म्हणाले, “३ फेब्रुवारी २०१२ रोजी प्रदर्शित झालेल्या येड्यांची जत्रा या आमच्या पहिल्या चित्रपटाला प्रेक्षकांनी भरभरून प्रतिसाद दिल्यानंतर आमची ‘ओरँजेन एंटरटेनमेंट’ ही कंपनी चांगल्या संहितेच्या शोधात होती. गेली दोन वर्षे आम्ही शोधात होतो, पण आता ‘संदूक’ ज्या प्रकारे आकाराला येतोय, ते पाहाता प्रेक्षकांना हाही चित्रपट आवडेल, याची आम्हाला खात्री आहे. ‘संदूक’मध्ये सकस आशय आहे, विनोदाचा शिडकावा आहे, अॅक्शन आहे, पण याचं सर्वात मोठं वैशिष्ट्य म्हणजे ही गोष्ट १९४०च्या दशकातील आहे. ‘संदूक’ची सर्वांनाच भुरळ पडेल, असा आम्हाला विश्वास आहे.” ‘संदूक’ची पटकथा अतुल काळे, आशिष रायकर आणि सुबोध खानोलकर यांनी लिहिली असून हृषिकेश जोशी याचे संवाद आहेत. छायालेखनाची जबाबदारी अजित रेड्डी पार पाडणार असून कला दिग्दर्शन महेश कुडाळकर यांचे असेल. गुरू ठाकूरच्या गाण्यांना अजित-समीर ही संगीतकार जोडी संगीतबद्ध करणार असून वेशभूषा महेश शेर्ला यांची, तर अॅक्शन संकल्पना प्रद्युम्नकुमार यांची असणार आहे.