यवतमाळ : वणी तालूक्यातील शिरपूर पोलीस स्टेशनचे सहाय्यक फौजदार दिलीप उपासराव कांबळे व नायक पोलीस शिपाई रामदास गंगाधर धोंगळे यांना पंचा समक्ष पाच हजार रुपयाची लाच स्विकारतांना लाच-लुचपत प्रतिबंधक विभागाच्या चमुने 21 फेब्रुवारीला रंगेहात पकडले.
या संदर्भात वणी तालूक्यातील तरोडा येथील ट्रॉन्सपोर्ट व्यावसायीक दिनकर नथ्थूजी भोयर यांना त्यांच्या मालकीच्या जप्त केलेल्या अपघात ग्रस्त मेटॉडोर (407) वाहनाला सोडण्यासाठी सहाय्यक फौजदार कांबळे व पोलीस शिपाई धोंगळे यांनी पाच हजार रुपये रकमेची मागणी केली होती. या तक्रारीच्या अनुषंगाने 20 फेब्रुवारी 2014 रोजी पडताळणी दरम्यान पाच हजार रुपये लाचेची मागणी केली. व एक हजार रुपये त्याच दिवशी दुसऱ्या दिवशी म्हणजे 21 फेब्रुवारी रोजी अमरावती परीक्षेत्र विभागाचे पोलीस अधीक्षक अरविंद साळवे यांच्या मार्गदर्शनाखाली सापळा रचून सहाय्यक फौजदार दिलीप उपासराव कांबळे व नायक पोलीस शिपाई रामदास गंगाधर धोंगळे यांना पाच हजार रुपयाची पंचा समक्ष पोलीस स्टेशनमध्ये लाच स्विकारतांना अटक करण्यात आली. त्यांच्याविरुध्द कलम 7,12,13 (1)(ड) सह 13(2) लाच-लुचपत प्रतिबंधक कायदा 1988 अन्वये गुन्हा नोंदविण्यात आला आहे. याप्रकरणी पोलीस निरीक्षक वैभव जाधव, पोलीस हवालदार अरूण गिरी, सुशिल झोडगेकर, प्रकाश शेंडे, पो. नायक सुधाकर मेश्राम, अमोल महल्ले, शैलेश ढोणे, गजानन राठोड, निलेश पखाले, अनील राजकुमार, अमित जोशी तसेच वाशीम येथील ॲन्टी करप्शन ब्युरोचे पोलीस हवालदार रमेश ताजने, कॉन्स्टेबल आकेश काळमुंदळे, चालक सुधाकर कोकेवार,यांनी सदर कामगीरी पार पाडली.