नवी दिल्ली- सार्वजनिक ठिकाणी सिगारेट ओढताना सापडल्यास आता २०० ऐवजी २० हजार रुपये दंड आकारण्यात येणार आहे.
केंद्र सरकारने सार्वजनिक ठिकाणी सिगारेट ओढणा-यांच्या विरोधात २० हजार रुपये दंड आकारण्याचा प्रस्ताव तयार केला आहे. तसेच किरकोळ सिगारेटच्या विक्रीवरही बंधने घालण्याचा विचार सरकार करत असल्याचे केंद्रीय आरोग्यमंत्री डॉ. हर्षवर्धन यांनी सांगितले. आरोग्य खात्याने सिगारेटबाबत तज्ज्ञांची समिती नेमली होती. या समितीने सार्वजनिक ठिकाणी सिगारेट ओढल्यास २०० वरून २० हजार रुपये दंड ठोठावण्याची शिफारस केली आहे. त्यामुळे सिगारेट ओढण्याची सवय तत्काळ कमी होऊ शकेल, असे त्यांचे मत आहे. त्यानुसार सिगारेट आणि अन्य तंबाखूजन्य उत्पादन कायदा २००३ मध्ये प्रस्तावित सुधारणा करण्याचा निर्णय सरकारने घेतला आहे. याबाबतचे विधेयक सरकारने तयार केले असून ते हिवाळी अधिवेशनात मांडण्यात येणार आहे. सिगारेट कंपन्यांनी सिगारेट ओढण्याचे धोके दाखवणारे चित्र न प्रसिद्ध केल्यास त्यांच्यावर ५० हजार रुपये दंड आकारावा. तसेच सिगारेट ओढण्याचे वय किमान १८ वरून २५ करावे, दुकानांवर सिगारेटच्या जाहिराती करू नयेत, आदी शिफारसी तज्ज्ञ समितीने केल्या आहेत.