नागपूर – फुग्यात गॅस भरताना सिलिंडरचा ‌स्फोट झाल्याने युवक ठार झाला. हा स्फोट एवढा जोरदार होता की युवकाच्या डोक्याचा चेंदामेंदा झाला. सिलिंडर टिन फाडून दुसऱ्या घरात घुसले. यात तीन मुली थोडक्यात बचावल्या. सोमवारी सायंकाळी पाच वाजताच्या सुमारास झालेल्या या स्फोटाने संपूर्ण टिमकी परिसर हादरला. नागरिकांमध्ये दहशत निर्माण झाली. दुर्गपाल महिपाल चव्हाण (२८, मूळ रा.उत्तर प्रदेश) असे मृत युवकाचे नाव आहे.
गत काही दिवसांपासून दुर्गपाल व त्याचे तीन साथीदार पाटील यांच्या वाड्यात भाड्याने राहात होते. दुर्गपाल घरासमोर फुग्यात गॅस भरत होता. तर अन्य तिघे घरात होते. गॅस भरत असताना अचानक सिलिंडरचा स्फोट झाला. दुर्गपालचे अर्धे डोके धडावेगळे झाले. तर सिलिंडर जवळपास ८० फूट वर उडून बाजूला असलेल्या मनोज हटवार यांच्या घराचे टिन छेदून आत पडले. जोरदार आवाज झाल्याने नागरिकांमध्ये खळबळ उडाली. सिलिंडर हवेत उडाल्याने नागरिक जीव मुठीत घेऊन सैरावैरा पळू लागले. उडालेले सिलिंडर घरात पडले त्यावेळी मनोज यांच्या दोन मुली आस्था व तपस्या व पुतणी तन्नू घरात खेळत होत्या. त्या थोडक्यात बचावल्या. स्फोटानंतर अन्य तिघांनी पळ काढला. माहिती मिळताच पोलिसांचा ताफा तेथे पोहोचला. चौकशीसाठी पोलिसांनी दोघांना ताब्यात घेतले. त्यापैकी एकजण स्फोटात जखमी झाला आहे.