मागच्या काही वर्षात मराठी सिनेमा आशय, विषय, मांडणीमध्ये कमालीचा बदलला आहे. हा बदल, सुधारलेला दर्जा बॉलिवूडच्या आघाडीच्या कलाकारांच्या नजरेतून सुटलेला नाही. त्यामुळेच राष्ट्रीय चित्रपट पुरस्कारांवर सातत्याने ठसा उमटवणा-या मराठी सिनेमाकडे बॉलिवूडचे आघाडीचे कलाकार आकर्षित होऊ लागले आहेत.
आता यात हिंदीतली टॉपची हिरॉईन सोनाक्षी सिन्हाची भर पडली आहे. मराठी सिनेमाचा आशय दर्जेदार असतो त्यातून प्रेरणा मिळते. बॉलिवूडमध्येही काही चांगले सिनेमे बनत आहेत मात्र मराठीमध्ये दिग्दर्शक जे काम करत आहेत त्याची आंतरराष्ट्रीय स्तरावर दखल घेतली जातेय. त्यामुळेच बॉलिवूडचे कलाकार आणि दिग्दर्शक ज्या तळमळीने मराठी सिनेमा बनवतायत त्याचे मला आश्चर्य वाटत नाही खरोखरच ही कौतुकास्पद गोष्ट आहे असे सोनाक्षी म्हणाली.
चित्रपटाच्या आशयामुळे मराठी सिनेमाच्या प्रेमात असल्याची सोनाक्षीने कबुली दिली. रितेश देशमुखचा लय भारी आणि महेश मांजरेकरचा शिक्षणाचा आयचा घो हे दोन सिनेमे पाहिल्याचे सोनाक्षीने सांगितले. त्यामुळे उद्या सोनाक्षी एखाद्या मराठी सिनेमामध्ये दिसली तर, आश्चर्य वाटून घेऊ नका.