नवी दिल्ली- सोन्याच्या भावामध्ये शनिवारी येथील सराफा बाजारामध्ये या वर्षामध्ये दिवसभरातील सर्वात मोठय़ा वाढीची नोंद झाली. सोन्याचे भाव ७१५ रुपयांनी वधारून २६,८५० रुपये प्रति तोळा बंद झाले. लग्नसराईतील खरेदी आणि जागतिक बाजारातील भाववाढीने सोन्याला नवी झळाळी प्राप्त झाल्याचे बाजारातील तज्ज्ञांनी सांगितले.
याबरोबरच डॉलरसमोर रुपयाचे सुरू असलेल्या अवमूलनामुळे सोन्याची आयातही महागली असून यामुळेही हा मूल्यवान धातू महागण्यास हातभार लागला. शुक्रवारी रुपया डॉलरसमोर ६१.७२ वर बंद झाला. ही रुपयाची महिनाभराची नीचांकी पातळी ठरली. चांदीची चमकही वाढली असून या धातूचे भाव २१०० रुपयांनी वधारले. दिवसअखेर हा भाव प्रतिकिलो ३६,७०० रुपयांवर गेला.
न्यूयॉर्कमध्ये सोन्याचा भाव ४० डॉलरने वधारून ११९३.३४ औंस या दोन आठवडयांच्या उच्चांकी पातळीवर झेपावला. ३१ ऑक्टोबरनंतरचा सर्वाधिक भाव ठरला. याबरोबरच डॉलरच्या कमजोरीमुळे सुरक्षित गुंतवणूक म्हणून सोन्याचा भाव वधारल्याचे सराफा उद्योगातील तज्ज्ञांनी सांगितले. जागतिक स्तरावर चांदीचा भावही ४.४ टक्क्यांनी वधारून १६.३१ औंसवर झेपावला. १४ फेब्रुवारीनंतरचा हा सर्वोच्च भाव ठरला.