यवतमाळ दि.13 : एच 1, एन 1 या विषाणू पासून पसरणाऱ्या स्वाईन फ्ल्यू या संसर्गजन्य आजाराचे रुग्न गेल्यावर्षी प्रमाणे या वर्षीही राज्यात पुणे, औरंगाबाद, नागपूरसह अन्य काही भागात कमी अधिक प्रमाणात आढळून आले आहे. या आजाराची भिती न बाळगता सतर्क राहण्याचे आवाहन आरोग्य विभागाच्यावतीने करण्यात आले आहे.
स्वाईन फ्ल्यू हा आजार संसर्गजन्य असल्यामुळे संसर्गापासून दुर राहण्यासाठी सतर्कता बाळगणे आवश्यक आहे. ताप, घसा दुखणे, खोकला, नाक गळणे, अंग दुखी, डोके दुखी ही या आजाराची लक्षणे आहेत. लक्षणानुसार अशा रुग्नांची तिन प्रकारे वर्गवारी करण्यात आली आहे. पहिल्या वर्गवारीत 38 डिग्री सेल्सीयसपेक्षा कमी म्हणजे सौम्य ताप, खोकला, घशाला खवखव, अंगदुखी, डोके दुखी, जुलाब, उलट्या या लक्षणांचा समावेश होतो. दुसऱ्या वर्गात वरील लक्षणाशिवाय तिव्र घसा दुखी, घशाला सुज व 38 डिग्री सेल्सीयसपेक्षा जास्त ताप तर तिसऱ्या लक्षणात वरील लक्षणाशिवाय धाप लागणे, छातीत दुखणे, खोकल्यावाटे रक्त पडणे, रक्तदाब कमी होणे, मुलांमध्ये चिडचीड, झोपाळूपणा, नखे निळसर काळी होणे या लक्षणांचा समावेश आहे. अशी लक्षणे आढळून आल्यास जवळच्या शासकीय आरोग्य संस्थेशी संपर्क साधने आवश्यक आहे. स्वाईन फ्ल्यू हा आजार होवू नये म्हणून वारंवार साबण व स्वच्छ पाण्याने हात धूने, शिंकतांना व खोकतांना नाका तोंडावर रुमाल धरणे, पौष्टीक आहार, लिंबु, आवळा, मोसंबी, संत्री, पालेभाज्या यासारख्या पदार्थांचा आहारात वापर आवश्यक आहे. याशिवाय धुम्रपान टाळून पुरेशी झोप आणि विश्रांती, भरपूर पाणी पिणे फायदेशिर आहे. शक्यतोवर हस्तांदोलन करु नये. सार्वजनिक ठिकाणी थूंकू नये तसेच वापरलेले मास्क इतरत्र फेकने टाळावे. डॉक्टरांच्या सल्याशिवाय औषधी घेवू नये. फ्ल्यूची लक्षणे आढळल्यास गर्दीच्या ठिकाणी जाण्याचे टाळावे. हा आजार होवू नये म्हणून 5 वर्षा खालील मुले, 65 वर्षा वरील नागरीक, गरोदर माता, उच्च रक्तदाब किंवा हृदयरोग, मधुमेह, फुफुस, यकृत याने आजारी असणाऱ्या व्यक्ती प्रतिकार शक्ती कमी झालेल्या व्यक्ती, दिर्घकाळ स्टिरॉईड घेणाऱ्या व्यक्ती यांनी स्वाईन फ्ल्यू पासून विशेष खबरदारी घेणे आवश्यक आहे. या आजारासाठी शासकीय रुग्नालयात औषधी उपलब्ध असून रुग्नांनी आजार झाल्यास घाबूरन न जाता त्यावरील प्रतिबंधात्मक उपायांचा अवलंब करावा, असे जिल्हा आरोग्य अधिकारी यांनी कळविले आहे.