नवी दिल्ली- स्वीस बँकेत भारतीयांकडून जमा झालेल्या ठेवीमध्ये तब्बल ४० टक्क्यांनी वाढ झाल्याची माहिती स्वित्झर्लंडमधील मध्यवर्ती बँकेने दिली आहे. ही रक्कम जवळ जवळ १४ हजार कोटी इतकी असल्याचे बँकेने म्हटले आहे.
स्वित्झर्लंडमधील असलेल्या बँकांमध्ये २०१३मध्ये भारतीयांकडून ठेवण्यात आलेल्या ठेवी ४० टक्क्यांनी वाढ झाल्याचे देशातील मध्यवर्ती स्वीस नॅशनल बँक(एसएनबी)च्या ताज्या आकडेवारी म्हटले आहे. भारतीयांच्या ठेवींमध्ये वाढ झाली असली तरी जगातील अन्य देशातील खातेदारांचा विचार केल्यास स्वीस बँकांमधील एकूण ठेवींमध्ये घट झाल्याचे ‘एसएनबी’ म्हटले आहे. ठेवींचे प्रमाण २०१३च्या आर्थिक वर्षाअखेर ९० लाख कोटींनी कमी झाल्याचे बँकेने आपल्या आकडेवारीत म्हटले आहे. २०१२या आर्थिक वर्षात भारतीयांकडून स्वीस बँकांमध्ये ठेवण्यात येणा-या ठेवींचे प्रमाण एक तृतीयांशने कमी झाले होते. भारतीयांकडून ठेवींमध्ये घट होण्याचा सर्वांत निच्चांक ठरला होता. तर २०१३ अखेर व्यक्तीगत भारतीयांनी ठेवीदारांनी स्वीस बँकांच्या खात्यांमध्ये १.९५ अब्ज स्वीस फँक तर मालमत्ता व्यवस्थापन कंपन्यांमार्फत ७.७३ कोटी स्वीस फँक इतक्या ठेवी ठेवल्या आहेत. भारतासह जगभरातील अनेक देशांकडून स्वीस बँकांमध्ये असलेल्या ठेवींची माहिती मागवण्यासाठी दबाव टाकला जात आहे. अशा वेळी एसएनबीने ही आकडेवारी प्रसिद्ध केल्यामुळे स्वीस बँकांमधील पैसा हा मुद्दा पुन्हा एकदा चर्चेत आला आहे. भारतातील नरेंद्र मोदी सरकारने काही दिवसांपूर्वीच विशेष तपास पथकाची नियुक्ती केली आहे. ही समिती पदेशात असलेल्या भारतीयांच्या काळ्यापैश्याचा तपास करणार आहे.